बीरगंज १० माघ
नेपाल सशस्त्र प्रहरीका प्रहरी महानिरिक्षक शैलेन्द्र श्रेष्ठले आज बीरगंज भन्सार कार्यालयस्थित राजश्व तथा भन्सार सशस्त्र प्रहरीको सुरक्षा बेसमा पुगी सबैभन्दा पहिले आफनो कामलाई प्राथमिकता दिनु भनेर आदेश दिएका छन् ।
बारा र पर्साको सीमा तथा भन्सार सुरक्षाको अनुगमनको लागि आजै बीरगंज आइपुगेका महानिरिक्षक श्रेष्ठले भन्सारमा राजश्व र सुरक्षाको लागि खटेका आफना जवानहरुलाई यस्तो आदेश दिएका हुन । साधन र स्रोत भनेको हामी फौजीको लागि दोस्रो कुरा हो भन्दै, हाम्रो लागि पहिलो कुरो आफनो काम प्रतिको दायित्व हुनु पर्छ भनेर बताए ।
बाराको बरियारपुरस्थित गढीमाई मन्दिरको दर्शन पश्चात बारा सीमा सुरक्षा कार्यालयको अनुगमन गरी बीरगंज भन्सार कार्यालय पुगेका महानिरिक्षक श्रेष्ठलाई बीरगंज भन्सार कार्यालयका निमित्त प्रमुख रामहरी अर्यालले सशस्त्र प्रहरीको सहयोगकै कारण यतिवेला बीरगंज भन्सार कार्यालयले लक्ष्यभन्दा करिव २ प्रतिशत बढी राजश्व संकलन गरेको जानकारी गराए ।
उनले अबको दिनमा बीरगंज भन्सार कार्यालय, नेपाल सशस्त्र प्रहरी र नेपाल प्रहरीले संयुक्त रुपमा एकद्धार प्रणालि अर्न्तर्गत अघि बढन सके राजश्वमा बृद्धि भई, सेवाग्राहीलाई समेत सजिलो हुने धारणा राखेका थिए । साथै बि.ओ.पि. र छोटी भन्सारको समन्वयको कमिले गर्दा भन्सार र बेस क्याम्प दुबैलाई काम गर्न गाहो भएको जानकारी गराए ।
यसबारेमा सशस्त्रका महानिरिक्षक श्रेष्ठले हाम्रो संगठनको उद्धेश्य भनेकै विस्थापितलाई स्थापित गर्ने भएकोले, सबै निकाय मिलेर अनौपचारिक र औपचारिक बैठक र छलफल गर्नु पर्नेमा जोड दिएका छन् ।
करिव आधा घण्टासम्म चलेको सो छलफलमा बाराको पथलैयास्थित रुद्ध वाहिनीका वाहिनीपति शुशिल कुमार श्रेष्ठ, पर्साका एसपी रमेश खरेल र सीसुका पर्साका एसपी कृष्णभक्त ब्रहृमाचार्य समेतको उपस्थिती रहेको थियो ।