काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेलाई गैरकानुनी रूपमा थुनामा राखिएको भन्दै सर्वोच्च अदालतमा बन्दी प्रत्यक्षीकरणको रिट दायर गरिएको छ ।
आइतबार लामिछानेकी पत्नी निकिता पौडेलले उक्त रिट सर्वोच्च अदालतमा दर्ता गराएकी हुन्। उनले रविलाई कानुन विपरीत थुनामा राखिएको दाबी गर्दै तत्काल रिहा गरिनुपर्ने माग गरेकी छन् ।
यसअघि सुप्रिम बचत तथा ऋण सहकारी ठगी प्रकरणमा चैत २२ गते उच्च अदालत तुलसीपुरको बुटवल इजलासले रवि लामिछानेलाई पुर्पक्षका लागि थुनामा पठाउने आदेश दिएको थियो। सो आदेशविरुद्ध लामिछाने पक्षले सर्वोच्च अदालतमा ‘थुनुवा दफा ७३’ अन्तर्गत निवेदन पनि दायर गरिसकेको छ ।
उक्त निवेदनमाथि सर्वोच्च अदालतले कैफियतसहितको प्रतिवेदन माग गरिसकेको छ भने बन्दी प्रत्यक्षीकरण रिटको सुनुवाइ सोमबारका लागि तोकिएको छ ।
