वीरगंज महानगरपालिका–२२ स्थित ऐतिहासिक छत्र बाबा मन्दिरको जग्गा विगत २० वर्षदेखि अलपत्र अवस्थामा रहेको भन्दै स्थानीयवासीले गुनासो गरेका छन् ।
मन्दिरको जग्गा खाली गराइए पनि त्यसको संरक्षण, व्यवस्थापन तथा सार्वजनिक हितमा सदुपयोग गर्न सम्बन्धित निकायले ठोस पहल नगरेको उनीहरूको आरोप छ । स्थानीयवासीका अनुसार, गाउँको ऐतिहासिक पहिचानसँग जोडिएको छत्र बाबा मन्दिरको जग्गा एक–दुई वर्षअघि खाली गराइएको थियो । तर, जग्गा खाली गराएपछि त्यसलाई व्यवस्थित गर्ने वा मन्दिरको संरक्षण तथा विकासका लागि कुनै ठोस योजना अघि बढाइएको छैन ।
मन्दिरको जग्गा खाली गरिए पनि त्यसको सदुपयोगका लागि आवश्यक प्रक्रिया अघि नबढ्नुले सम्बन्धित निकायको कार्यशैलीमाथि प्रश्न उठेको स्थानीयको भनाइ छ । त्यस्तै, गाउँका अन्य सार्वजनिक जग्गामा समेत घर निर्माण भएको स्थानीयले बताएका छन् । तर, ती जग्गा खाली गराउन प्रभावकारी पहल नभएको उनीहरूको गुनासो छ। गाउँमा रहेका सार्वजनिक जग्गाको अतिक्रमण हटाउने क्रममा दुई जनाको घर मात्र हटाइएको विषयलाई लिएर अहिले राजनीतिकरण भइरहेको स्थानीयको आरोप छ ।
स्थानीयवासीले सार्वजनिक जग्गाको संरक्षणमा सबैलाई समान व्यवहार गर्नुपर्ने माग गरेका छन् । कुनै व्यक्ति वा राजनीतिक स्वार्थका आधारमा नभई प्रचलित कानुनअनुसार निष्पक्ष रूपमा सार्वजनिक जग्गा संरक्षण तथा अतिक्रमण हटाउने कार्य अघि बढाउनुपर्ने उनीहरूको जोड छ ।
स्थानीयले छत्र बाबा मन्दिरको जग्गाको उचित व्यवस्थापन गर्न, गाउँका अन्य सार्वजनिक जग्गाको अवस्थाबारे छानबिन गर्न तथा अतिक्रमण हटाउने कार्यमा सबैलाई समान मापदण्ड लागू गर्न सम्बन्धित निकायसँग माग गरेका छन् ।
