वीरगंज महानगरपालिका–१० आदर्शनगरस्थित कैलाश होटलमा भएको कुटपिट प्रकरणसम्बन्धी भिडियो वीरगंज सिटीलाई प्राप्त भएको छ ।
भिडियोमा रेस्टुरेन्टमा खाजा खाइरहेका अंकित जालानमाथि केही व्यक्तिले हात र मुक्काले प्रहार गरेको तथा उनको मोबाइल फुटाइएको दृश्य देखिएको छ । प्राप्त भिडियोअनुसार, कात्तिक ६ गते साँझ ७ बजेर २२ मिनेटमा कैलाश होटलको रेस्टुरेन्टमा खाजा खाइरहेका जालान बसेको टेबलनजिक सन्दीप तुल्सियान, दीपक तिवारी, धिरज अग्रवाल, सिताराम सिंह र राकेश राज लगायतका व्यक्तिहरू प्रवेश गरेको देखिन्छ ।
भिडियोमा सन्दीप तुल्सियान टेबलको बायाँतर्फबाट र दीपक तिवारी दायाँतर्फबाट जालाननजिक पुगेर उनीमाथि हात र मुक्काले प्रहार गर्न थालेको देखिन्छ । त्यस्तै, टेबलको अगाडिपट्टि धिरज अग्रवाल, सिताराम सिंह र राकेश राजलगायतका व्यक्तिहरू रहेको दृश्य पनि भिडियोमा कैद भएको छ ।
सोही क्रममा राकेश राजले जालानको आइफोन १६ प्रो मोबाइल फुटाएको दृश्यसमेत भिडियोमा देखिएको छ । त्यसपछि जालानलाई होटलको रेस्टुरेन्टबाट बाहिर लैजाने क्रममा पनि उनीमाथि हात र मुक्काले प्रहार गरिएको दृश्य भिडियोमा देखिन्छ । यस प्रकरणमा पक्राउ परेका दीपक तिवारीलाई प्रहरीले अनुसन्धानका लागि सात दिनको म्याद थप गराएको छ ।
कुटपिटबाट पीडित भएको दाबी गर्ने अंकित जालानले तिवारीसहित पाँच जनाविरुद्ध अपहरण, कुटपिट तथा लुटपाटको आरोप लगाउँदै पर्सा प्रहरी र जिल्ला सरकारी वकिल कार्यालयमा हुलाक मार्फत जाहेरी दिएका छन् ।
घटनामा संलग्न रहेको आरोप लागेका अन्य व्यक्तिहरूको भूमिकाबारे भने अनुसन्धान भईरहेको प्रहरीले जनाएको छ ।
सम्बन्धित समाचार
वीरगंजको कैलाश होटलमा होहल्ला र कुटपिट गरेको आरोपमा दीपक तिवारी प्रहरी नियन्त्रणमा
कैलाश होटल कुटपिट प्रकरण : दीपक तिवारीको सात दिन म्याद थप, तुल्सियान र अग्रवालमाथि थप उजुरीपछि चारजना फरार
