मुम्बई । बलिउड अभिनेता सलमान खान अभिनीत आगामी युद्धप्रधान चलचित्र ‘मातृभूमि : मे वार रेस्ट इन पिस’ को ट्रेलरले आफ्नो असामान्य लामो अवधिका कारण चर्चा बटुलेको छ ।
चलचित्रको आधिकारिक ट्रेलरले भारतीय केन्द्रीय चलचित्र प्रमाणन बोर्ड (सीबीएफसी) बाट प्रमाणपत्र प्राप्त गरेको छ। बोर्डले ट्रेलरको अवधि ४ मिनेट ४३ सेकेन्ड निर्धारण गर्दै ‘यूए १६ प्लस’ श्रेणीको प्रमाणपत्र दिएको छ ।
करिब पाँच मिनेट लामो ट्रेलर भारतीय सिनेमाका सबैभन्दा लामो ट्रेलरमध्ये एक मानिएको छ। यसअघि अजय देवगन अभिनीत ‘सिंघम अगेन’ को ट्रेलर ४ मिनेट ५८ सेकेन्ड र ‘रामायण : भाग १’ को पहिलो ट्रेलर ४ मिनेट १५ सेकेन्ड लामो थियो ।
‘यूए १६ प्लस’ प्रमाणपत्रअनुसार १६ वर्ष वा सोभन्दा माथिका दर्शकले चलचित्रको ट्रेलर हेर्न सक्नेछन् भने १६ वर्षभन्दा कम उमेरका दर्शकले अभिभावकको निगरानी वा मार्गदर्शनमा मात्र हेर्नुपर्नेछ ।
सलमान खान र चित्रांगदा सिंह मुख्य भूमिकामा रहेको उक्त चलचित्र युद्धप्रधान कथावस्तुमा आधारित छ। सलमानका प्रशंसकहरू चलचित्रको ट्रेलर सार्वजनिक हुने प्रतीक्षामा छन् ।
भारतीय सञ्चारमाध्यमका अनुसार चलचित्रको ट्रेलर यही शुक्रबार मुम्बईमा विशेष कार्यक्रम आयोजना गरी सार्वजनिक गर्ने तयारी भइरहेको छ। यद्यपि, कार्यक्रमको मिति र समयबारे निर्माण पक्षले औपचारिक पुष्टि गरिसकेको छैन।
यसअघि चलचित्रको पहिलो झलकका रूपमा सलमान खानले ‘तेरी सेक्सी ब्युटी’ शीर्षकको गीत सार्वजनिक गरेका थिए । गीतमा सलमान खानले स्वर दिएका छन् भने भिडियोमा उनीसँगै अभिनेत्री चित्रांगदा सिंह पनि देखिएकी छन्। उक्त गीत विभिन्न स्ट्रिमिङ प्लेटफर्ममा उपलब्ध छ ।
चलचित्रको लामो ट्रेलर र सलमान खानको युद्धप्रधान भूमिकालाई लिएर अहिले बलिउड वृत्तमा चासो बढ्दै गएको छ ।