काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आफ्नो पार्टी सरकार बनाउने दौडधुपमा नरहेको स्पष्ट पारेका छन् ।
सोमबार संसद् भवन परिसरमा सञ्चारकर्मीहरूसँग कुरा गर्दै उनले पार्टीको प्राथमिकता अहिले सरकार बनाउनेतिर नभएर आम जनतासँग प्रत्यक्ष सम्पर्कमा केन्द्रित रहेको बताएका छन् ।
‘अहिले हाम्रो ध्यान सरकार बनाउनेतिर छैन,’ प्रचण्डले भने, ‘हाम्रो ध्यान जनतामै जाने छ।’ उनले आगामी मध्यपहाडी लोकमार्ग अभियानको बारेमा पनि जानकारी दिए र भने, ‘हामी मध्यपहाडी लोकमार्ग अभियान जाँदैछौं ।’
अध्यक्ष दाहालले वर्तमान सत्ता गठबन्धन र नेपाली कांग्रेसप्रति कटाक्ष गर्दै भने, ‘हामी देउवाजी कसैलाई पनि फकाउने पक्षमा छैनौँ। आफ्नै बोझले यो सरकार ढल्छ। जनताको मनबाट त यो ढलिसकेको छ ।’
आगामी आर्थिक वर्षको नीति तथा कार्यक्रममाथि टिप्पणी गर्दै प्रचण्डले भने, ‘यो नीति र कार्यक्रम केवल औपचारिकता पूरा गर्न ल्याइएको हो। यसले जनभावनामा आधारित विकासको कुरा नगरेको छ ।’
