पाकिस्तानद्वारा भारतविरुद्ध ‘अपरेसन बुन्यान अन मार्सुस’ सुरु, सैन्य प्रतिष्ठान निशाना बनाइने

अन्तराष्ट्रिय

Home
अन्तराष्ट्रिय
पाकिस्तानद्वारा भारतविरुद्ध ‘अपरेसन बुन्यान अन मार्सुस’ सुरु, सैन्य प्रतिष्ठान निशाना बनाइने

पाकिस्तानद्वारा भारतविरुद्ध ‘अपरेसन बुन्यान अन मार्सुस’ सुरु, सैन्य प्रतिष्ठान निशाना बनाइने

वीरगंज सिटी शनिबार, वैशाख २७, २०८२

पाकिस्तानले भारतविरुद्ध औपचारिक सैन्य कारबाही ‘अपरेसन बुन्यान अन मार्सुस’ प्रारम्भ गरेको घोषणा गरेको छ ।

पाकिस्तानी सरकारले एक विज्ञप्ति जारी गर्दै उक्त अपरेसन सुरु गरिएको र यसअन्तर्गत भारतका प्रमुख सैन्य प्रतिष्ठानहरूलाई लक्षित गरिने जनाएको हो । यसअघि भारतमाथि भएका विभिन्न आक्रमणहरूमा आफ्नो संलग्नता नरहेको दाबी गर्दै आएको पाकिस्तानले यसपटक भने औपचारिक रूपमै आक्रमणको घोषणा गरेको हो ।

पाकिस्तानी सरकारद्वारा जारी विज्ञप्तिमा भनिएको छ, "जवाफी अपरेसन बुन्यान अन मार्सुसको एक भागका रूपमा ‘उपयुक्त जवाफ’ दिन भारतका प्रमुख सैन्य प्रतिष्ठानलाई निशाना बनाइएको हो । यो कारबाही भारतको प्रारम्भिक हमलाको जवाफमा गरिएको हो, जुन हाम्रो मातृभूमि, जनता र सार्वभौमसत्तामाथिको आक्रमण थियो ।"

साथै, पाकिस्तानले भारतले शुक्रबार राति आफ्ना तीनवटा वायुसेनाका हवाई अखडामा क्षेप्यास्त्र प्रहार गरेको पनि दाबी गरेको छ ।

उल्लेखनीय छ कि जम्मु कश्मीरको पहलगाममा अप्रिल २२ मा भएको आतंकवादी हमलामा २६ जनाको मृत्यु भएपछि भारतले पाकिस्तानलाई दोष दिँदै उसको विरुद्ध ‘अपरेसन सिन्दूर’ नामक कारबाही सञ्चालन गरिरहेको छ ।

पाकिस्तानको यो कदमलाई सोही ‘अपरेसन सिन्दूर’को प्रत्युत्तरका रूपमा हेरिएको छ । यस घटनाले दुई आणविक शक्ति सम्पन्न छिमेकी राष्ट्रबीच तनाव थप चर्किने देखिएको छ ।