इरानबाट उद्धार गरिएका दुई नेपाली नागरिक मंगलबार भारतको राजधानी नयाँदिल्ली आइपुगेका छन् । नेपाल सरकारको अनुरोधमा भारतले आफ्ना नागरिकसँगै दुई नेपालीको समेत उद्धार गरेको हो ।
नयाँदिल्लीस्थित नेपाली दूतावासका अनुसार बुटवलका गणेशप्रसाद पोखरेल र सुमन गैरे मंगलबार दिउँसो दिल्ली आइपुगेका हुन् । उनीहरूलाई दूतावासका अधिकारी र भारतीय विदेश मन्त्रालयले इन्दिरा गान्धी अन्तर्राष्ट्रिय विमानस्थलमै स्वागत गरेका थिए । दुवै जनालाई दिल्लीबाट सोझै काठमाडौं पठाइएको दूतावासले जनाएको छ ।
दूतावासका अनुसार इरानबाट उद्धार हुन लागेका ११ नेपालीमध्ये पहिलो चरणमा दुई जनालाई ल्याइएको हो । बाँकी नेपाली आइतबार राति नै तेहरानबाट मसद पुगेका छन् । ती सबैजना विभिन्न दूतावास तथा इरानी रेस्टुरेन्टहरूमा काम गर्दै आएका थिए ।
उद्धार अभियानमा सहकार्य गरेको भन्दै नेपाली दूतावासले भारतीय विदेश मन्त्रालय र तेहरानस्थित भारतीय दूतावासलाई धन्यवाद दिएको छ ।
भारतीय विदेश मन्त्रालयका प्रवक्ता रणधिर जयसवालका अनुसार मसदबाट विशेष विमानमार्फत २८१ जना भारतीय, ३ जना श्रीलंकाली र २ जना नेपालीको उद्धार गरिएको हो । सो विमान भारतीय समयअनुसार दिउँसो ३ बजे नयाँदिल्लीमा अवतरण गरेको थियो । उद्धार गरिएका सबैको स्वागतका लागि भारतीय विदेश राज्यमन्त्री पबित्रा मार्गेरिटा आफैं विमानस्थल पुगेकी थिइन् ।
‘अपरेसन सिन्धू’ नाम दिइएको यस विशेष उद्धार अभियानअन्तर्गत भारतले हालसम्म २,५७६ जना आफ्ना नागरिकलाई स्वदेश फर्काइसकेको भारतीय विदेश मन्त्रालयले जनाएको छ ।
