जिल्ला कारागार पर्सामा चिकित्सकको दरबन्दी भए पनि वर्षौंदेखी त्यसको रिक्तता रहँदा बन्दी तथा थुनुवाहरूले पर्याप्त स्वास्थ्य सेवा पाएका छैनन् ।
वीरगञ्ज कारागारमा सातौँ वा आठौँ तहको एक जना मेडिकल अधिकृतको दरबन्दी भए पनि हाल त्यहाँ एक जना हेल्थ असिस्टेन्टले मात्र स्वास्थ्य सेवा प्रवाह गर्दै आएका छन् । कारागारमा यो समस्या तब थप सार्वजनिक भएको हो जब वीरगञ्ज महानगर–२५ का राहुल साह तुरहा गत मङ्गलबार व्यायाम गर्दा स्वास्थ्य जटिलतामा परेर नारायणी अस्पतालमा उपचारका क्रममा मृत्यु भए । यस घटनाले कारागारमा नियमित स्वास्थ्य परीक्षण र दरबन्दीअनुसार चिकित्सकको आवश्यकता विषयमा प्रश्न खडा गरेको छ ।
जिल्ला कारागार प्रमुख खिमराज भुसालले कारागार व्यवस्थापन विभागसमक्ष दरबन्दीअनुसारको मेडिकल अधिकृतको व्यवस्था गर्न पत्राचार गरिएको जानकारी दिएका छन् ।
वीरगञ्ज कारागारमा हाल स्वदेशी एवं विदेशी थुनुवा र कैदी गरी कुल एक हजार ३ सय १० जना रहेका छन् । यसमध्ये महिला कैदी ५ जना, महिला थुनुवा ४२ जना र दुई जना आश्रित बालिका छन् । विदेशी थुनुवा र कैदी १ सय ९९ जना रहेका छन् । कारागार ऐन, २०७९ अनुसार ५०० जनाभन्दा बढी बन्दी रहने कारागारमा अस्पताल र सोभन्दा कम बन्दी हुने कारागारमा स्वास्थ्य चौकीको व्यवस्था गरिनुपर्ने अनिवार्य छ ।
जिल्ला कारागारमा चिकित्सकको नियमित उपस्थिति नभएकोले बन्दी र थुनुवाहरूको स्वास्थ्य सुरक्षामा चुनौती देखिएको छ ।
भिडियाे सामाग्री
