वीरगंज | जिल्ला कारागार पर्सामा सातौँ वा आठौँ तहको एक जना मेडिकल अधिकृतको दरबन्दी भए पनि वर्षौंदेखि सो पद रिक्त छ । हाल कारागारमा एक जना स्वास्थ्य सहायक (हेल्थ असिस्टेन्ट) ले मात्र स्वास्थ्य सेवा प्रदान गर्दै आएका छन् ।
गत मङ्गलबार वीरगंज महानगर–२५ का थुनुवा राहुल साह तुरहाको व्यायामका क्रममा स्वास्थ्यमा जटिल समस्या आएपछि नारायणी अस्पतालमा उपचारको क्रममा मृत्यु भएको घटनापछि कारागारमा नियमित स्वास्थ्य परीक्षण र दरबन्दीअनुसार चिकित्सकको व्यवस्था गर्नुपर्ने विषय सार्वजनिक भएको हो ।
जिल्ला कारागार प्रमुख खिमराज भुसालका अनुसार, कारागार व्यवस्थापन विभागसमक्ष मेडिकल अधिकृतको व्यवस्था गर्न पत्राचार भइसकेको छ । हाल वीरगंज कारागारमा स्वदेशी तथा विदेशी गरी १ हजार ३१० जना बन्दी रहेका छन् । तीमध्ये महिला कैदी ५ जना, महिला थुनुवा ४२ जना र २ जना आश्रित बालिका छन् । विदेशी थुनुवा र कैदीको संख्या १९९ रहेको छ ।
कारागार ऐन, २०७९ अनुसार, ५०० जनाभन्दा बढी बन्दी रहने प्रत्येक कारागारमा तोकिएकै श्ययासहितको अस्पताल र सोभन्दा कम बन्दी रहने कारागारमा स्वास्थ्य चौकीको व्यवस्था गर्नुपर्ने प्रावधान छ ।
भिडियाे सामाग्री
