वीरगन्ज महानगरपालिका वडा नम्बर १२ मुर्लीको नयाँ टोलमा हैजाका बिरामी भेटिएपछि स्वास्थ्यकर्मीको टोली परिचालन गरिएको छ ।
महानगरपालिकाले शुक्रबार रातिदेखि नै टोलीलाई प्रभावित क्षेत्रमा खटाएको हो । हैजाको शंका लागेपछि प्रमुख राजेशमान सिंहले तत्काल स्वास्थ्य टोली परिचालन गर्ने निर्देशन दिएका थिए ।
महानगरका अनुसार मुर्ली टोलका करिब ३० जना बासिन्दा झाडापखालाका कारण तराई हस्पिटलमा भर्ना भएका थिए । एकैपटक ठूलो संख्यामा बिरामी पुगेपछि अस्पतालले हैजाको शंका व्यक्त गर्दै महानगरलाई जानकारी दिएको थियो ।
नारायणी अस्पताल र जिल्ला जनस्वास्थ्य कार्यालयसँगको समन्वयमा गरिएको परीक्षणमा १६ वर्षीय बालक, २४ वर्षीय युवक र २४ वर्षीय महिलामा हैजाको जीवाणु भिब्रियो कोलेरा पाइएको हो । तीमध्ये बालकको अवस्था गम्भीर रहेको महानगर स्वास्थ्य शाखा प्रमुख राजु शाहले जनाएका छन् ।
यसैबीच, मुर्ली टोलका घरमा प्रयोग भइरहेको पिउने पानीको नमुना थप परीक्षणका लागि काठमाडौंको टेकुस्थित स्वास्थ्य विज्ञान प्रयोगशालामा पठाइएको छ ।
घर–घरमा स्वास्थ्य टोली
हैजा फैलन नदिन र स्थानीयलाई सतर्क बनाउन शुक्रबार रातिदेखि नै स्वास्थ्यकर्मीहरू घर–घरमा पुगेका छन्। टोलीले हैजाबाट जोगिने उपायहरूबारे जानकारी दिँदै शंकास्पद बिरामी भेटिए तत्काल नजिकैको स्वास्थ्य संस्थामा लैजान आग्रह गरेको छ ।
सचेतना अभियानमा जिल्ला जनस्वास्थ्य कार्यालयका अधिकृत जयमोद ठाकुर, महानगरका जनस्वास्थ्य अधिकृत सुमनचन्द्र ठाकुरलगायतको टोली सक्रिय रहेको छ । ठाकुरका अनुसार, पर्सा जिल्लामा पछिल्लो १० वर्षयता पहिलोपटक हैजाको प्रकोप देखिएको हो ।
हैजा र सतर्कता
भिब्रियो कोलेरा नामक जीवाणु दूषित खाना वा पानीमार्फत शरीरमा प्रवेश गरेपछि हैजा लाग्ने गर्छ । यसका लक्षणमा निरन्तर झाडापखाला, वान्ता, पेट दुख्ने, आँखा गाडिने, शरीरमा पानी कमी भई मांसपेसी दुख्ने र ज्वरो आउने समस्या देखिन्छ। समयमै उपचार नपाए मृत्यु समेत हुन सक्ने चिकित्सकहरू चेतावनी दिन्छन् ।
हैजाबाट जोगिनका लागि उमालिएको वा निर्मलीकरण गरिएको पानी मात्र पिउन, तरकारी तथा हरियो सागपात उमालेको पानीले पखालेर पकाएर खान, बासी खाना र राम्ररी नपकाएको मासु वा माछा नखान, साबुनपानीले हात धुन, भाँडाकुडा सफा राख्न र सफा शौचालय प्रयोग गर्न सिफारिस गरिएको छ ।
महानगर प्रमुख सिंहले हैजा गम्भीर संक्रामक रोग भएकाले यसको रोकथाममा कुनै पनि प्रकारको लापरबाही नगर्न आग्रह गर्दै सतर्क रहन सबैलाई आह्वान गरेका छन् ।
