स्याङ्जामा मोटरसाइकलको आवाज चर्को बनाएर चलाएको निहुँमा ३२ वर्षीय युवक ढालबहादुर थापाको हत्या भएको छ । घटनामा संलग्न भएको आरोपमा प्रहरीले ८ जनालाई पक्राउ गरेको छ ।
भदौ ७ गते राति करिब ११ बजे वालिङ नगरपालिका–५ जर्कोटमा थापामाथि कुटपिट भएको थियो। उनी गाउँमै मोटरसाइकल चलाइरहेका थिए । दिउँसो त्यही स्थानमा भलिबल प्रतियोगिता भईरहेको र युवाहरूको जमात ठूलो भएको थियो ।
साथीभाइ भेटघाटकै क्रममा अबेरसम्म बसेको उनी र चापाकोटबाट आएका अन्य युवाबीच सामान्य भनाभनपछि झडप भएको प्रहरीले जनाएको छ । त्यस क्रममा मोटरसाइकलको आवाज चर्को भएकोलाई निहुँ बनाएर उनलाई निर्घात कुटपिट गरिएको थियो ।
गम्भीर घाइते भएका थापालाई गण्डकी मेडिकल कलेज, पोखरा पुर्याइयो । तर भदौ ८ गते बिहान चिकित्सकले उनलाई मृत घोषणा गरे ।
जिल्ला प्रहरी कार्यालयले घटनालाई गम्भीर रूपमा लिएर विशेष अपरेसन टोली गठन गरी अनुसन्धान अघि बढाएको थियो । घटनामा संलग्न ८ जनालाई विभिन्न स्थानबाट पक्राउ गरिएको जिल्ला प्रहरी प्रमुख दधिराम न्यौपानेले जानकारी दिए। पक्राउ परेकामा हरिनास गाउँपालिका–५ का २२ वर्षीय सिजन थापा, २४ वर्षीय अनिल शाही ठकुरी, २० वर्षीय विवेक मानन्धर, १८ वर्षीय बादल विक, २३ वर्षीय गुरुप्रसाद (गोरे) लम्साल, १७ वर्षीय आर्यन क्षेत्री, २३ वर्षीय विश्वास वाग्ले र वडा नं. ६ का २२ वर्षीय निशान थापा छन् ।
पक्राउ परेकामाथि कर्तव्य ज्यान मुद्दा दर्ता गरी भदौ ८ गतेदेखि लागू हुने गरी जिल्ला अदालत स्याङ्जाबाट १० दिनको म्याद थप गरिएको छ ।
