वीरगन्ज महानगरपालिकाले महानगर क्षेत्रमा फैलिँदो झाडापखाला तथा हैजा संक्रमणको जोखिमलाई ध्यानमा राख्दै पानी परीक्षण प्रक्रिया सुरु गरेको छ ।
दूषित खानेपानी नै संक्रमणको प्रमुख कारण हुनसक्ने आशंकामा महानगरले नमुना संकलन गरी प्रयोगशालामा परीक्षण गर्न थालेको हो ।
महानगर प्रमुख राजेशमान सिंहको सचिवालयका अनुसार वडा नं. १०, ११ र १२ का पाँच स्थानका धाराबाट सोमबार नमुना संकलन गरिएको छ । माइक्रोबायोलोजिस्ट अजय मण्डल र वातावरण निरीक्षक प्रकाश ऐरसहितको प्राविधिक टोलीले शंकास्पद क्षेत्रमा पुगेर धाराको पानी संकलन गरी परीक्षण थालेको हो ।
महानगरले आफैंले परीक्षण गर्ने गरी इ–कोली परीक्षण सुरु गरेको छ । साथै, वडा नं. १ छपकैयास्थित खानेपानी प्रशोधन केन्द्रमै युनिसेफले उपलब्ध गराएको विशेष किट प्रयोग गरेर आधुनिक प्रयोगशाला स्थापना गरी कोलिफर्म परीक्षणसमेत सुरु गरिएको छ ।
महानगरका अनुसार इ–कोली परीक्षणको प्रारम्भिक नतिजा २४ घण्टाभित्र प्राप्त हुने र कोलिफर्म परीक्षणको विस्तृत प्रतिवेदन आउन करिब ७२ घण्टा लाग्नेछ । नतिजा प्राप्त भएपछि दूषित पानी प्रवाह भइरहेको क्षेत्र पत्ता लगाउन सजिलो हुने र त्यसअनुसार तुरुन्त कदम चाल्न सकिने जनाइएको छ ।
हाल महानगरले अत्यधिक प्रभावित क्षेत्रका धाराहरूलाई प्राथमिकता दिँदै परीक्षण अघि बढाइरहेको छ भने अन्य शंकास्पद स्थानका नमुना पनि आवश्यकताअनुसार संकलन गरी परीक्षण गर्ने तयारी भइरहेको जनाएको छ ।
