हैजाको संक्रमण फैलन सक्ने जोखिम बढेसँगै वीरगन्ज महानगरपालिकाले होटल र मासु पसलहरूमा अनुगमन सुरु गरेको छ । मंगलबार महानगरको संयुक्त टोलीले मुर्ली, पानी टंकी, बसपार्क र नगवा क्षेत्रका होटल तथा मासु पसलहरूको सरसफाइ अवस्था जाँच गरेको हो ।
अनुगमनका क्रममा पसल तथा होटलभित्रको सरसफाइ, खानेपानीको स्वच्छता, सुरक्षित भण्डारण प्रणाली, फ्रिजमा राखिएका मासु, माछा, अण्डा तथा अन्य खाद्य सामग्रीहरूको निरीक्षण गरिएको थियो । टोलीले व्यवसायीहरूलाई स्वास्थ्य र स्वच्छताप्रति विशेष ध्यान दिन चेतावनी दिँदै सचेत गराएको छ ।
महानगर प्रमुख राजेशमान सिंहको निर्देशनअनुसार पशु सेवा शाखा, वातावरण शाखा र महानगर प्रहरी बलको संयुक्त टोलीले अनुगमन गरेको हो । सिंहले हैजा फैलन रोक्न व्यवसायी स्वयं जिम्मेवार बन्नुपर्ने आवश्यकता औंल्याउँदै नियमित अनुगमनलाई निरन्तरता दिइने बताए ।
महानगरले हैजा नियन्त्रणका लागि जनचेतना कार्यक्रम, दूषित पानी परीक्षण, संक्रमित क्षेत्रको सरसफाइ तथा स्वास्थ्यकर्मीमार्फत घरदैलो अभियान सञ्चालन गरिरहेको छ । स्थानीयवासीलाई पानी उमालेर मात्र पिउन, सफा खानेकुरा सेवन गर्न र व्यक्तिगत सरसफाइमा विशेष ध्यान दिन आग्रह गरिएको छ ।
