चितवन | सौराहाको युनिक वाइल्ड रिसोर्टमा आज ३० जना तेस्रो मुलुकका पर्यटक आउँदै गरेको सञ्चालक गुणराज थपलियाले जानकारी दिनुभएको छ । गत वर्षहरूमा यसै समयमा पर्यटकले भरिभराउ हुने सौराहामा यस वर्ष दसैँभरको सुनसानपछि पर्यटक आउन थालेसँगै होटल व्यवसायीहरूमा उत्साह थपिएको छ ।
थपलियाका अनुसार राजनीतिक परिवर्तन र ठाउँ–ठाउँमा भएका पहिरोका कारण पर्यटकहरूले बुकिङ रद्द गर्दा व्यवसायीहरू निराश बनेका थिए। तर मङ्गलबारदेखि आन्तरिक र बाह्य पर्यटक क्रमशः आउन थालेका छन् । उहाँले भन्नुभयो, “दसैँको समयमा पाँच प्रतिशत हाराहारी मात्र पर्यटक भएका थिए भने हिजोदेखि अब ३० प्रतिशत हाराहारी पर्यटक पुगेका छन्। गत वर्ष यो समयमा ८० प्रतिशत हाराहारी पर्यटक आउने गर्थे ।”
क्षेत्रीय होटल सङ्घका अध्यक्ष ओम पाण्डेले आफ्नो होटल ल्यान्डमार्कसहित अन्य होटलहरूमा पनि पर्यटक आउन थालेको जानकारी दिनुभयो । जेनजी आन्दोलनअघि नेपाल आएका पर्यटक सडक सुधारसँगै सौराहा आउन थालेको उहाँले बताउनुभयो। “बुकिङ राम्रो नभए पनि सोझै आउने पर्यटक बढ्न थालेका छन्,” पाण्डेले थप्नुभयो ।
जङ्गल सफारी लजका सञ्चालक सुमन घिमिरेले आन्तरिक र बाह्य पर्यटक क्रमशः बढ्ने अनुमान व्यक्त गर्नुभयो । उहाँका अनुसार निकुञ्जभित्रको जङ्गल सफारी खोलिएसँगै पर्यटकको आगमन बढेको छ। होटल भिष्टाका सञ्चालक रमेश सिलवालले आज मात्रै १४ जनाले टेलिफोन गरेर सौराहा आउँदै गरेको जानकारी दिनुभयो ।
सौराहाका अन्य पर्यटन व्यवसायी दीपेन्द्र खतिवडा पनि रेष्टुराँहरूमा पर्यटकको आगमन बढेको र हात्ती सफारी गर्नेहरूको संख्या बढ्दै गएको बताउनुभयो । विगत वर्ष दसैँको समयमा हात्ती चढ्ने पर्यटकलाई पुर्याउन मुस्किल हुने गरेको भए पनि यस वर्ष दसैँभर सौराहा सुनसान रहेको छ ।
चितवन राष्ट्रिय निकुञ्ज घुम्न आउने पर्यटक बस्नका लागि प्रायः सौराहा आउने गर्दछन् । उनीहरूले निकुञ्ज र सामुदायिक वनमा सफारी गर्ने गर्दछन् र दुर्लभ वन्यजन्तु जस्तै एकसिङ्गे गैँडा, पाटे बाघ लगायतका जनावर हेर्न रुचाउँछन्। चितवन राष्ट्रिय निकुञ्ज विश्वमा सफारीका लागि परिचित स्थल हो ।
भिडियाे सामाग्री
