हमासको आक्रमणमा मारिएका नेपाली युवा विपिन जोशीको शव अन्तर्राष्ट्रिय रेडक्रस सोसाइटी (आईसीआरसी)ले इजरायली सेनालाई जिम्मा लगाएको इजरायलस्थित नेपाली दूतावासले जनाएको छ ।
इजरायलस्थित नेपाली राजदूत धनप्रसाद पण्डितका अनुसार विपिनको शव हाल सैनिक अस्पतालमा राखिएको छ र डिएनए परीक्षणका लागि आवश्यक प्रक्रिया अघि बढाइएको छ ।
राजदूत पण्डितले भने, “विपिनको भनिएको शव डिएनए परीक्षणपछि मात्रै औपचारिक रूपमा पुष्टि हुनेछ। हाल परीक्षण प्रक्रिया जारी छ र रिपोर्ट आउन करिब चार घण्टा लाग्ने अनुमान गरिएको छ ।”
उनका अनुसार डिएनए परीक्षणपछि विपिनको मृत्यु पुष्टि भएमा इजरायली सरकारले नै शव नेपाल पठाउने तयारी गरेको छ । उक्त सम्पूर्ण प्रक्रिया पूरा हुन केही दिन लाग्न सक्ने दूतावासले जानकारी दिएको छ ।
