निजी अस्पतालमा कार्यरत स्वास्थ्यकर्मीहरूले नेपाल सरकारको मापदण्डअनुसार तलब स्केल लागू गर्नुपर्ने मागसहित वीरगंजमा प्रदर्शन गरेका छन् ।
नेपाल पारामेडिकल एशोसिएशन वीरगंज महानगर कमिटीको आयोजनामा गरिएको प्रदर्शनमा सिएमए, स्टाफ नर्स, अनमी, हेल्थ असिस्टेन्ट, रेडियोग्राफर, फार्मासिस्ट, ल्याब टेक्निसियन, फिजियोथेरापिस्टलगायतका स्वास्थ्यकर्मीहरूको सहभागिता रहेको थियो ।
उनीहरू नारायणी अस्पताल अगाडि जम्मा भई ‘निजी अस्पतालका स्वास्थ्यकर्मीहरूमाथिको श्रम शोषण बन्द गर’, ‘महँगो अस्पताल, सस्तो स्वास्थ्यकर्मी’, ‘सेवा ठूलो, तलब सानो — कहिलेसम्म ?’, ‘स्वास्थ्यकर्मीको सम्मान गर’ जस्ता नारासहित घण्टाघर चोकसम्म ¥यालीसहित पुगेका थिए । त्यहाँ आयोजित कोणसभामा विभिन्न वक्ताहरूले स्वास्थ्यकर्मीहरूको पेशागत अधिकार र सामाजिक सुरक्षाको सवालमा राज्य र अस्पताल व्यवस्थापन दुवै उदासीन भएको आरोप लगाए ।
कोणसभामा बोल्ने वक्ताहरूले भने, “निजी अस्पतालहरूले व्यावसायिक मुनाफा कमाइरहेका छन्, तर त्यही अस्पतालमा काम गर्ने स्वास्थ्यकर्मीहरू न्यूनतम तलब र असुरक्षित वातावरणमा काम गर्न बाध्य छन् ।” उनीहरूले सरकारले तोकेको मापदण्ड अनुसार निजी अस्पतालमा पनि तलब स्केल लागू गर्नुपर्ने, कार्यसमय ४२ घण्टाभन्दा बढी नहुने व्यवस्था गर्नुपर्ने, वार्षिक १० प्रतिशत तलब वृद्धि सुनिश्चित गर्नुपर्ने र सबै स्वास्थ्यकर्मीका लागि बीमा र सामाजिक सुरक्षा अनिवार्य गर्नुपर्ने माग राखे ।
त्यस्तै, स्वास्थ्यकर्मीहरूले परिवारका सदस्यलाई नि:शुल्क स्वास्थ्य उपचारको व्यवस्था गर्नुपर्ने, सार्वजनिक र निजी दुवै अस्पतालका लागि समान विज्ञापन र दररेट प्रणाली लागू गर्नुपर्ने, र बिदा तथा भत्ता सुविधामा एकरूपता ल्याउनुपर्ने माग पनि राखे ।
नेपाल पारामेडिकल एशोसिएशन पर्साका अध्यक्षका अनुसार, पछिल्ला वर्षहरूमा निजी अस्पतालहरूमा कार्यरत स्वास्थ्यकर्मीहरूले लामो समयदेखि असमान तलब संरचना र श्रम अधिकारको अभावमा काम गर्नुपरेको बताए । उनले भने, “सरकारले मापदण्ड बनाउँछ, तर कार्यान्वयनमा निजी अस्पतालहरू बेपर्वा छन् — यसले स्वास्थ्य सेवाको गुणस्तरमा पनि असर पारिरहेको छ ।”
एशोसिएशनका महासचिवले चेतावनी दिँदै भने, “यदि सरकारले र अस्पताल व्यवस्थापनले हाम्रो माग पूरा नगरे, देशव्यापी रूपमा आन्दोलनलाई सशक्त बनाइनेछ ।”
यसअघि पनि काठमाडौं, पोखरा, नेपालगञ्ज, विराटनगरलगायतका शहरहरूमा समेत पारामेडिकल र नर्सिङ संघले यस्तै मागसहित विरोध प्रदर्शन गरेका थिए । स्वास्थ्यकर्मीहरूले अब एकीकृत आन्दोलनको तयारी गरिरहेको जनाइएको छ ।
