हराएको मोबाइल फोन फेला पारेर त्यसमा रहेको मोबाइल बैंकिङ सेवा दुरुपयोग गर्दै १० लाख रुपैयाँ ट्रान्सफर गरेको अभियोगमा एक व्यक्ति पक्राउ परेका छन् ।
पक्राउ पर्ने व्यक्ति मोरङका ३२ वर्षीय मुकेश कुमार मण्डल भएको प्रहरीले जनाएको छ । काठमाडौं उपत्यका अपराध अनुसन्धान कार्यालयका अनुसार मण्डलले हराएको मोबाइलमा सञ्चालित मोबाइल बैंकिङ एपमार्फत पीडितको बैंक खाताबाट आफ्नै र इसेवा खातामा रकम सारेर ठगी गरेको प्रारम्भिक अनुसन्धानमा खुलेको छ ।
घटनाबारे विशेष सूचनाको आधारमा खटिएको टोलीले मण्डललाई मंगलबार काठमाडौंको बौद्ध क्षेत्रबाट पक्राउ गरेको हो । प्रहरीले उनलाई ठगीसम्बन्धी कसुरमा मुद्दा दर्ता गरी आवश्यक कानुनी कारबाहीका लागि जिल्ला प्रहरी परिसर काठमाडौंमा पठाएको जनाएको छ । प्रहरीका अनुसार हाल डिजिटल माध्यमबाट हुने यस्ता ठगी घटनामा वृद्धि भइरहेको छ ।
प्रहरीले नागरिकलाई मोबाइल फोन हराएमा तुरुन्त बैंक तथा सेवा प्रदायकसँग सम्पर्क गरी मोबाइल बैंकिङ सेवा बन्द गर्न र गोपनीय पासवर्ड परिवर्तन गर्न आग्रह गरेको छ ।
