सप्तरी | सप्तरी जिल्लासँग जोडिएको नेपाल–भारत सीमामा अधिकांश सीमास्तम्भ हराएको तथ्य सार्वजनिक भएको छ । जिल्लाभरको ७८ किलोमिटर सिमामा रहेको ६४९ सीमास्तम्भमध्ये ४७९ वटा हराएको खुलेको छ ।
सशस्त्र प्रहरीबल नेपाल नम्बर २ छिन्नमस्ता बाहिनीको समन्वयमा, सशस्त्र प्रहरीबल नेपाल नम्बर ६ गण हेडक्वार्टर सप्तरीले राजविराजमा आयोजना गरेको “सीमावासीसँग सशस्त्र प्रहरी कार्यक्रम“ मा यो तथ्य सार्वजनिक गरिएको हो । कार्यक्रममा सप्तरीका ५ पालिका प्रमुख, वडाध्यक्ष र सरोकारवालाहरुको सहभागिता रहेको थियो ।
सशस्त्र प्रहरीबल नेपाल नम्बर ६ गण हेडक्वार्टर सप्तरीका गणपति प्रहरी उपरीक्षक रोशन वुढाथोकीले जानकारी दिनुभयो कि दशगाजा क्षेत्रमा १७० वटा मात्र सीमास्तम्भ बाँकी रहेका छन् । उहाँका अनुसार कतिपय सीमास्तम्भ जिर्ण अवस्थामा रहेका छन् भने कतिपय पिलर भाँचेको, बाढीले बगाएको वा हराएको पाइएपछि मरम्मत र पुनर्निर्माण आवश्यक छ ।
कार्यक्रममा सहभागी अधिकांश वक्ताले हराएका सीमास्तम्भको पुनर्निर्माण, चोरी–तस्करी नियन्त्रण, लागुऔषध ओसारपोसार नियन्त्रण र लामो समयदेखि बन्द रहेका सप्तरीका छोटी भन्सार कार्यालयको पुनः सञ्चालनमा जोड दिनुभयो ।
कार्यक्रममा हनुमाननगर कंकालिनी नगरपालिकाका नगरप्रमुख बिरेन्द्र माझी, डाक्नेश्वरी नगरपालिकाका रामलखन मलाह, तिलाठी कोईलाडी गाउँपालिकाका अध्यक्ष अरुण मंडल, बलान बिहुल गाउँपालिकाका अध्यक्ष खेमचन्द्र यादव, विभिन्न वडाका वडाध्यक्ष तथा सञ्चारकर्मीले सीमाक्षेत्रका समस्या र सुझाव राख्नुभएको थियो ।
कार्यक्रमका प्रमुख अतिथि सहायक बाहिनीपति अशोक कुमार बमले दशगाजा क्षेत्रका हराएका, भाँचेका र बाढीले बगाएका सीमास्तम्भको पुनर्निर्माण र मर्मतका लागि विभागमार्फत पहल थालिएको र छिट्टै समाधान हुने विश्वास व्यक्त गर्नुभयो ।
