वीरगंज | अख्तियार दुरुपयोग अनुसन्धान आयोगले नापी कार्यालय पर्सामा व्यापक अनियमितता र गैरकानुनी क्रियाकलाप भइरहेको सूचनाका आधारमा छापामारी गरेको छ । जेलराेडस्थित नापी कार्यालयमा गरिएको छापामारीका क्रममा कार्यालयका सर्वेक्षक रामप्रमोद राउतलाई आयोगले नियन्त्रणमा लिएर अनुसन्धान थालिएको छ ।
आयोगका अनुसार राउतले नाप–नक्सा एकातिर पार्ने, हालसाबिक अर्कै व्यक्तिका नाममा मिलाउनेदेखि लिएर कानुनविपरीत विभिन्न कार्यहरू गर्दै आएका थिए। दीर्घकालदेखि विभिन्न प्रलोभन र आर्थिक स्वार्थमा परेर गैरकानुनी ढंगले जग्गा सम्बन्धी प्रक्रिया मिलाउने कार्यमा उनी संलग्न रहेको प्रारम्भीक अनुसन्धानले देखाएकाले उनलाई कार्यालयबाट नियन्त्रणमा लिएकाे अख्तियारले जनाएको छ ।
मोबाइल, फाइल र कागजात बरामद
छापामारीका क्रममा राउतले प्रयोग गर्दै आएको मोबाइल फोन, कागजात तथा विभिन्न विवादित जग्गा सम्बन्धी फाइलहरू आयोगले लिएर गएको छ । अख्तियारका एक अधिकारीका अनुसार “राउतले कार्यालयको अधिकार दुरुपयोग गरेर व्यक्तिको जग्गा अर्काको नाममा हालसाबिक मिलाउने, सीमाना परिवर्तन गर्ने तथा नाप–नक्सा गलत रूपमा तयार गर्ने जस्ता क्रियाकलाप गर्दै आएको पाइएको” हो ।
अख्तियारले केही अन्य कर्मचारीलाई पनि नियन्त्रणमा लिन खोजेको भए पनि उनीहरू कार्यालयमा अनुपस्थित भएकाले पक्राउ गर्न नसकिएको स्रोतले जनाएको छ ।
वीरगंजको स्काईलाइन मल विवादमा पनि राउत कै संलग्नता
सर्वेक्षक राउत यतिबेला वीरगंजको आदर्शनगरस्थित स्काईलाइन मलको हालसाबीक विवादमा पनि मुख्य भूमिकामा रहेको स्रोतले जनाएकाे छ । राउतका कारण व्यक्तीकाे जग्गामा विवादित भइ अहिले अर्काले हडपेकाे जग्गाधनीहरूकाे अाराेप छ । यस स्काईलाइन मल रहेकाे जग्गाकाे विषयमा समेत अख्तियारले अध्ययन गरिरहेको जनाएको छ ।
मालपोत–नापीमा जग्गा कब्जा र चलखेल बढ्दो
पर्सा जिल्लामा पछिल्लो समय पदको दुरुपयोग गर्दै व्यक्तिगत फाइदाका लागि जग्गा हडप्ने, नक्सा मिलाउने, सीमाना परिवर्तन गर्ने, हालसाबिक जालसाजी गर्ने तथा व्यक्तिको सम्पत्ति कब्जा गर्नेसम्मका गतिविधि बढ्दै गएको स्थानीयहरूले आरोप लगाउँदै आएका छन् ।
छपकैयाँस्थित ‘दी जुद्ध मैच फैक्ट्री’ को ठूलो जग्गा समेत मालपोत तथा नापी कार्यालयका केही कर्मचारीसँग मिलेमतो गरेर व्यक्तिगत नाममा लैजाने प्रयास भएको र त्यसको अनुसन्धान सिबिआईले गरिरहेको बुझिएको छ ।
पर्सामा बढ्दो अनियमितता, ठूलो परिमाणमा जग्गा–जमिनका मुद्दा, सरकारी कर्मचारीको संलग्नता तथा उच्च स्तरको भ्रष्टाचारको आरोप बढेपछि अख्तियारले नापी कार्यालयलाई विशेष निगरानीमा राखेको छ । नियन्त्रणमा लिइएका राउतसँगै अन्य कागजातहरूको विस्तृत परीक्षणपछि थप विषय खुल्ने आयोगले जनाएकाे छ ।
अख्तियारका एक उच्च अधिकारीका अनुसार, “पर्सामा विवादित जग्गा प्रकरणमा धेरैजसो कार्यालयका आवश्यक कागजातहरूमा हेरफेर भएको पाइएकाले नापी कार्यालयमा भ्रष्टाचार र मिलेमतोबारे निगरानी बढाइएकाे हाे ।
