सप्तरी | मोबाइल चोरी गरेको आरोपमा कुटपिटबाट एक युवकको मृत्यु भएपछि प्रहरीले एक महिलासहित चार जनालाई पक्राउ गरेको छ । राजगढ गाउँपालिका–६ फकिरा टोलका १९ वर्षीय मुकेशकुमार यादवको कुटपिटबाट मृत्यु भएको हो ।
प्रहरीका अनुसार विष्णुपुर गाउँपालिका–४ की ३५ वर्षीया सरोकुमारी साह, राजविराज–१६ बोरियाका १७ वर्षीय दिनेश ठाकुर, १४ वर्षीय छोटु भनिने रविन्द्र ठाकुर तथा २५ वर्षीय सन्तोष राउतलाई पक्राउ गरिएको छ ।
बुधबार सरोकुमारी साहले मोबाइल चोरी गरेको आरोपमा यादवलाई लठ्ठीले कुटपिट गर्दा उनको घाँटी तथा शरीरका विभिन्न भागमा गम्भीर चोट लागेको थियो। गम्भीर घाइते भएका यादवलाई गजेन्द्रनारायण सिंह अस्पताल राजविराजमा प्रारम्भिक उपचारपछि थप उपचारका लागि छिन्नमस्ता अस्पताल पठाइएको थियो। तर शुक्रबार साँझ उपचारकै क्रममा उनको मृत्यु भएको प्रहरीले जनाएको छ ।
घटना सार्वजनिक भएपछि जिल्ला प्रहरी कार्यालय सप्तरीले अनुसन्धान सुरु गरेको छ । अनुसन्धानको क्रममा कुमारी साहसहित अन्य तीनजनालाई पक्राउ गरिएको जिल्ला प्रहरी कार्यालय सप्तरीका प्रहरी नायब उपरीक्षक (डीएसपी) डम्बरबहादुर पुरीले जानकारी दिए ।
मृतक यादव र पक्राउ परेका चारै जना हाल राजविराज नगरपालिका–१६ बोरिया लवटोलीमा बस्दै आएका थिए ।
