सर्लाही । सर्लाहीमा २२ हजारभन्दा बढी नयाँ मतदाता थपिएका छन् । गत असोज ८ गते राष्ट्रपति रामचन्द्र पौडेलबाट मतदाता नामावलीसम्बन्धी अध्यादेश जारी भएसँगै सर्लाहीसहित देशैभर आगामी फागुन २१ गतेका लागि तोकिएको निर्वाचनलाई लक्षित गरी नामावली दर्ता प्रक्रिया सुरु गरिएको थियो ।
सामान्यतया निर्वाचन घोषणा भएपछि मतदाता नामावली दर्ता रोक्ने प्रावधान रहेको भए पनि यसपटक सरकारले अध्यादेशमार्फत कानुन परिवर्तन गरेर निरन्तर नामावली सङ्कलन गरेको हो । उक्त अध्यादेश जारी भएदेखि मङ्सिर ५ गतेसम्म सर्लाहीमा २२ हजार ५९५ नयाँ मतदाता दर्ता भएको जिल्ला निर्वाचन कार्यालयका प्रमुख शिवनारायण साहले जानकारी दिए ।
उनका अनुसार नयाँ दर्तामा परेका मतदातामध्ये ६ हजार ५०० जनाले सदरमुकाम मलङ्गवास्थित कार्यालयमै उपस्थित भएर नाम दर्ता गराएका छन् । कार्यालयमा आएर दर्ता गराउनेमध्ये ३ हजार ६८१ जना पुरुष र २ हजार ८१९ जना महिला छन् ।
कार्यालयमा आएर बायोमेट्रिक दिएर दर्ता गराउनेभन्दा अनलाइनमार्फत दर्ता गराउनेको संख्या झण्डै तीन गुणा बढी रहेको कार्यालयले जनाएको छ । सर्लाहीमा थपिएका २२ हजार ५९५ मध्ये १६ हजार ९५ जनाले राष्ट्रिय परिचयपत्रका आधारमा अनलाइनबाटै मतदाता नामावलीमा नाम दर्ता गराएका हुन् ।
राष्ट्रिय परिचयपत्र बनाउँदा संकलित जैविक तथ्याङ्क (बायोमेट्रिक) का आधारमा मतदाता नामावली दर्ता गर्न मिल्ने व्यवस्था भएपछि देशैभर नयाँ मतदाता दर्ता उल्लेख्य रूपमा बढेको प्रमुख साहको भनाइ छ । उनका अनुसार अनलाइनबाट आएका विवरण रुजु गर्नेसहितका काम तीव्र गतिमा भइरहेको छ ।
निर्वाचन आयोगले मतदाता नामावलीमा कहीँ त्रुटि भए सच्याउने व्यवस्था गर्दै मङ्सिर २१ देखि २७ गतेभित्र निवेदन दिन सकिने जनाएको छ । अहिले १६ वर्ष पूरा भएपछि नागरिकता बनाएका व्यक्तिले नाम दर्ता गराएका भए पनि फागुन २१ गते हुने निर्वाचनमा मतदान गर्न फागुन २० गतेसम्म १८ वर्ष पूरा भएको हुनुपर्ने स्पष्ट गरिएको छ ।
सर्लाहीमा यसअघि चार लाख ९० हजार चार जना मतदाता दर्ता थिए। नयाँ थपिएको २२ हजार ५९५ सहित अब जिल्लामा मतदाताको संख्या झनै बढेको कार्यालयले जनाएको छ ।
