जेन जी आन्दोलनका क्रममा सर्वोच्च अदालत परिसरमा गराइएको आगजनी र तोडफोड प्रकरणमा संलग्न पाँच जनालाई प्रहरीले पक्राउ गरी सार्वजनिक गरेको छ ।
पक्राउ पर्नेहरूमा राजु परियार, कुमार पराजुली, सुशील श्रेष्ठ र ज्योति थापा घतानी रहेका छन् भने एक जनाको परिचय प्रहरीले खुलाएको छैन ।
जिल्ला प्रहरी परिसर काठमाडौँका प्रवक्ता पवनकुमार भट्टराईले आज आयोजित पत्रकार सम्मेलनमा पक्राउ परेका व्यक्तिहरूलाई सार्वजनिक गर्दै सर्वोच्चमा आगजनी गर्ने अन्य केही व्यक्तिहरूको पनि पहिचान भइसकेको र छिट्टै कानुनी दायरामा ल्याइने जानकारी दिए। उक्त घटनापछि सर्वोच्च अदालतले आगजनी तथा क्षतिसाधनमा संलग्नविरुद्ध छानबिन गरी कारबाही गर्न परिसरमा आधिकारिक जाहेरी दर्ता गराएको थियो ।
प्रहरीका अनुसार जेनजी आन्दोलनका दौरान सर्वोच्च अदालत परिसरमा मात्रै आगजनी, तोडफोड र आपराधिक उपद्रवसम्बन्धी कुल १०४ वटा जाहेरी दर्ता भएका छन् । तीमध्ये २२ व्यक्तिगत, ६६ सरकारी कार्यालय र १६ संस्थागत तथा व्यापारिक प्रतिष्ठान सम्बन्धी रहेका छन् । आन्दोलनका क्रममा काठमाडौँ उपत्यकामा मात्र ४९ जनाको मृत्यु भएको प्रहरी तथ्याङ्कले देखाउँछ । तीमध्ये सात जनाको पहिचान अझै खुलेको छैन । साथै, आन्दोलनकै क्रममा हराएका सात जनाको हुलिया प्राप्त भइसकेको प्रहरीले जनाएको छ ।
प्रवक्ता भट्टराईले चुच्चेपाटीस्थित भाटभटेनी नजिक फेला परेका सातवटा कङ्कालबारे उत्पन्न शंका सम्बन्धी भ्रम चिर्दै ती शव पूर्ण रूपमा जलेका कारण डिएनए नमुना संकलन गर्न नसकिएको स्पष्ट पारे । “पहिचानका लागि अन्य स्थानमा परीक्षण पठाउनेबारे विचार भइरहेको छ । पहिचान पुष्टि नभएसम्म कुनै निष्कर्षमा पुगिने अवस्था छैन,” उनले भने । यसबीच, जेनजी आन्दोलनसँगै विभिन्न किसिमका कसुरमा १ सय ५४ मुद्दा दर्ता भएका छन् । प्रहरीले २ सय ६७ जनालाई पक्राउ गरेको छ ।
तीमध्ये ८७ जना हाजिर जमानीमा रिहा भएका छन्, ३३ जना धरौटीमा छुटेका छन्, र १ सय १३ जना प्रहरी हिरासतमा छन् भने ४३ जना पुर्पक्षका लागि थुना मै पठाइएकाे छ ।
