भरतपुर, मङ्गलबार: चितवन–३ बाट प्रतिनिधिसभा सदस्यको उम्मेदवारी दिने तयारीमा भरतपुर महानगरपालिकाकी मेयर रेनु दाहालले मङ्गलबार मेयर पदबाट राजीनामा दिने तयारी गरेकी छन् । उपमेयर चित्रसेन अधिकारीसमेत उपस्थित पत्रकार सम्मेलनमा दाहालले मेयर पदबाट राजीनामा दिने जानकारी दिइन् ।
दाहाल कांग्रेससँग गठबन्धन गरेर २०७४ र २०७९ सालको स्थानीय तह निर्वाचनमा भरतपुरको मेयरमा विजयी भएकी हुन् । तत्कालीन माओवादी केन्द्रको उम्मेदवार रहेकी दाहाल मेयर हुँदा दुवै पटक कांग्रेसबाट उपमेयर चुनिएका थिए ।
नेकपा (माओवादी केन्द्र, नेकपा एमाले लगायतको एकीकरण) ले उनलाई चितवन–३ बाट उम्मेदवार बनाउने तयारी गरेको छ । यसपटक दाहाल कुनै गठबन्धनविना चुनावमा होमिँदैछिन् ।
पत्रकार सम्मेलनमा दाहालले भनिन्, “मेयरको पदबाट राजीनामा दिँदै गर्दा घर छाडेर जान लागेझैं भएको छ। तर सधैं महानगरमा बसेर काम गर्न संविधानले पनि अनुमति दिँदैन। जनताको सेवा गर्ने हो । यसका लागि राजनीति भन्दा अरू केही नगरेका कारण चुनाव आएपछि उठ्नै पर्ने भयो ।”
उनले थपिन्, “देशको परिस्थितिले २०८४ को चुनाव ८२ मै हुने भएपछि रहरले भन्दा पनि बाध्य भएर मेयर पद छाड्नुपर्यो। पहिलो पटक समानुपातिकबाट संविधानसभा सदस्य भएकी, दोस्रो पटक संविधानसभा सदस्यका लागि निर्वाचन हुँदा काठमाडौंमा प्रकाशमान सिंहसँग प्रतिस्पर्धा गरेको अनुभवले गर्दा निर्वाचनमा उठ्दा तरंगित हुने बानी छैन ।”
दाहालले आफ्नो कार्यक्षमता र अनुभवको पक्षमा बोलेकी छिन् । उनले भनिन्, “मान्छेले चर्चा गरेको सुन्छु – ‘रेनु विकास निर्माणमा अब्बल हो, नीति निर्माणमा सक्दैन’ भन्छन्। म त संविधानसभा सदस्य भएकी छु । मेयर भएर ऐन र कार्यविधि बनाएँ। कानुन बनाउने विषयमा पनि म अब्बल छु । पूर्वप्रधानमन्त्री पुष्पकमल दाहालकी छोरी भन्ने टीका टिप्पणीलाई मैले कामबाट जवाफ दिएको छु ।”
रेनु दाहालले मतदातालाई भने, “देशलाई ईमान्दार जनप्रतिनिधिको आवश्यकता छ र त्यो म पूरा गर्नेछु। कोही भन्छन् जान्नेलाई छानौं, म भन्छु गर्नेलाई छानौं। यसको हेक्का मतदाताले गर्नुहुन्छ ।”
चितवन–३ क्षेत्रभरतपुर महानगरपालिकाको पश्चिम भेग र माडी नगरपालिकामा पर्छ। तीन निर्वाचन क्षेत्र रहेको चितवनमा चितवन–३ सबैभन्दा धेरै मतदातासहितको क्षेत्र हो । यहाँ २०७९ मा प्रतिनिधिसभा सदस्यमा राष्ट्रिय प्रजातन्त्र पार्टी (राप्रपा)का विक्रम पाण्डे विजयी भएका थिए ।
यसपटक राप्रपाले विक्रम पाण्डेलाई नै उम्मेदवार बनाउने तयारी गरेको छ। राष्ट्रिय स्वतन्त्र पार्टी (रास्वपा) बाट सोविता गौतम उठ्ने छन् भने एमालेले शंकर थपलियालाई उम्मेदवार बनाउँदैछ । कांग्रेसले उम्मेदवारको नाम अहिलेसम्म टुङ्ग्याएको छैन ।
