प्रतिनिधिसभा निर्वाचनका लागि आजदेखि देशभर मतदाता शिक्षा कार्यक्रम सुरु भएको छ । निर्वाचन आयोगले प्रतिनिधिसभा सदस्य निर्वाचनका लागि निर्वाचन शिक्षा तथा मतदाता शिक्षा निर्देशिका, २०७८ बमोजिम विशेष कार्यक्रम स्वीकृत गर्दै सञ्चालनमा ल्याएको हो ।
आयोगका अनुसार, आम नागरिकलाई मताधिकारको महत्व र मतदान प्रक्रिया बारे जानकारी दिनका लागि आजदेखि सुरु भएको कार्यक्रम यही फागुन १७ गतेसम्म देशभरका ७५३ स्थानीय तहका ६ हजार ७४३ वडामा सञ्चालन हुनेछ ।
यसका लागि प्रत्येक वडामा एक–एक जना मतदाता शिक्षा स्वयंसेवक परिचालन गरिनेछ । सो स्वयंसेवकले बस्ती र घरदैलोमा पुगेर नमुना मतपत्रको माध्यमबाट निर्वाचनको महत्व र मतदान प्रक्रिया सम्बन्धी जानकारी दिनेछन् ।
निर्वाचन आयोगले प्रभावकारी मतदाता शिक्षाले निर्वाचनमा मतदाताको सहभागिता बढाउने र बदर मतको अनुपात न्यूनीकरणमा महत्त्वपूर्ण भूमिका खेल्ने विश्वास व्यक्त गरेको छ ।
साथै आयोगले सातै प्रदेश सरकार, सबै स्थानीय तह, निर्वाचनमा प्रतिस्पर्धा गर्ने राजनीतिक दल, उम्मेदवार तथा सञ्चार जगत् लगायत सम्पूर्ण सरोकारवालामा सहयोग, समन्वय र सहजीकरणका लागि अनुरोध गरेको छ । आयोगका प्रवक्ता नारायणप्रसाद भट्टराईले सो जानकारी दिनुभयो ।
