सप्तरी जिल्लाको डाक्नेश्वरी नगरपालिका – ९ पत्थरगाडास्थित श्री एस.एल.पी. मा.वि. महुकी पत्थरगाडामा विद्यार्थीलाई वितरण गरिने दिवा खाजा व्यवस्थापनमाथि गम्भीर प्रश्न उठेको छ ।
विद्यालयमा दिवा खाजा वितरण हुँदै आए पनि विद्यार्थीलाई कापीको पन्ना र प्लास्टिकमा खाजा राखेर खान दिइएको दृश्य सार्वजनिक भएपछि स्थानीयवासी आक्रोशित बनेका छन् ।
सरकारले बालबालिकाको स्वास्थ्य सुधार तथा विद्यालयमा विद्यार्थीको उपस्थिती दर बढाउने उद्देश्यले दिवा खाजा कार्यक्रम सञ्चालन गर्दै आएको छ । तर उक्त विद्यालयमा भने सरसफाइ र व्यवस्थापनमा चरम लापरबाही देखिएको आरोप लागेको छ ।
कागज र प्लास्टिकमा खाजा वितरण गर्दा विद्यार्थीको स्वास्थ्यमा जोखिम पर्न सक्ने भन्दै अभिभावकहरूले गम्भीर चिन्ता व्यक्त गरेका छन् ।
स्थानीयवासीले घटनाबारे सम्बन्धित निकायले तत्काल छानबिन गरी दोषीमाथि कारबाही गर्नुपर्ने माग गरेका छन् । उनीहरूका अनुसार दिवा खाजा कार्यक्रमजस्तो संवेदनशील विषयमा यस्तो लापरबाही हुनु बालबालिकाको सम्मानमाथि ठेस पुग्नुका साथै सरकारी कार्यक्रमप्रतिको विश्वाससमेत कमजोर बनाउने कार्य हो ।
