सप्तरीको डाक्नेश्वरी नगरपालिका–७ मझौरामा भएको मोटरसाइकल दुर्घटनामा एक महिलाको मृत्यु भएको छ ।
शुक्रबार पातो–कठौना भित्री सडकखण्डमा भएको उक्त दुर्घटनामा ५५ वर्षीया मन्जुदेवी मण्डलको ज्यान गएको हो ।
जिल्ला प्रहरी कार्यालय सप्तरीका अनुसार पातोबाट अर्नाहा तर्फ जाँदै गरेको स. ८ प. ९८९३ नम्बरको मोटरसाइकल अनियन्त्रित भई दुर्घटना भएको थियो । दुर्घटनामा मोटरसाइकलको पछाडि सवार मण्डल गम्भीर घाइते भएकी थिइन् ।
उहाँलाई तत्काल उपचारका लागि राजविराजस्थित छिन्नमस्ता अस्पताल पुर्याइए पनि चिकित्सकले मृत घोषणा गरेका प्रहरी निरीक्षक विजय कार्कीले जानकारी दिए ।
मोटरसाइकल चालक डाक्नेश्वरी नगरपालिका–६ बथनाहा निवासी ३२ वर्षीय सुरेन्द्रकुमार मण्डल रहेको र उनी नेपाल प्रहरीमा कार्यरत भई इलामको ट्राफिक पोस्ट हर्कटेमा खटिएको खुल्न आएको छ । प्रहरीका अनुसार चालक मण्डल मृतकका छोरा हुन् र उनी दुर्घटनामा सकुशल रहेका छन् ।
प्रहरीले दुर्घटनामा संलग्न मोटरसाइकल नियन्त्रणमा लिएको छ भने घटनाबारे थप अनुसन्धान भइरहेको जनाएको छ । मृतकको शव पोस्टमार्टमपछि परिवारजनको जिम्मा लगाइएको छ ।
प्रारम्भिक अनुसन्धानका आधारमा तीव्र गति र सडकको अवस्थाका कारण मोटरसाइकल अनियन्त्रित भएको हुन सक्ने अनुमान गरिएको प्रहरीले जनाएको छ । सडक सुरक्षामा सावधानी अपनाउन र ट्राफिक नियमको पालना गर्न प्रहरीले सबैलाई आग्रह गरेको छ ।
