बैतडीमा २२ हजारभन्दा बढी बालबालिकालाई भिटामिन ‘ए’ क्याप्सुल खुवाइने भएको छ ।
स्वास्थ्य कार्यालय बैतडीका अनुसार ६ देखि ५९ महिनासम्मका २२ हजार ७५७ जना बालबालिकालाई भिटामिन ‘ए’ क्याप्सुल खुवाइने कार्यक्रम तय गरिएको छ ।
राष्ट्रिय भिटामिन ‘ए’ कार्यक्रमअन्तर्गत वैशाख ६ र ७ गते जिल्लाभर बालबालिकालाई भिटामिन ‘ए’ क्याप्सुलसँगै जुकाको औषधि खुवाइने स्वास्थ्य कार्यालयका सूचना अधिकारी खगेन्द्र कार्कीले जानकारी दिएका छन् ।
उक्त कार्यक्रमअन्तर्गत १२ देखि ५९ महिनासम्मका २० हजार ४ सय ८३ जना बालबालिकालाई जुकाको औषधि खुवाउने लक्ष्य राखिएको छ ।
कार्यक्रम सफल पार्न जिल्लाभर ८३० जना महिला स्वास्थ्य स्वयंसेविकालाई परिचालन गरिएको छ। स्वयंसेविकाहरूले टोल–टोलमा पुगेर बालबालिकालाई भिटामिन ‘ए’ र जुकाको औषधि खुवाउने स्वास्थ्य कार्यालयले जनाएको छ ।
बालबालिकाको स्वास्थ्य सुरक्षालाई ध्यानमा राख्दै आफ्ना बालबालिकालाई अनिवार्य रूपमा कार्यक्रममा सहभागी गराउन स्वास्थ्य कार्यालय बैतडीका प्रमुख तीर्थराज भट्टले अभिभावकसँग आग्रह गरेका छन् ।
पहिलो दिन छुटेका बालबालिकालाई दोस्रो दिन पनि औषधि खुवाइने व्यवस्था मिलाइएको स्वास्थ्य कार्यालयले जनाएको छ ।
