राष्ट्रिय स्वतन्त्र पार्टी (रास्वपा) का सभापति रवि लामिछाने भारतको औपचारिक भ्रमणमा जाने भएका छन् । भारतीय जनता पार्टी (भाजपा) अध्यक्ष नीतिन नवीनको निमन्त्रणामा लामिछाने नेतृत्वको प्रतिनिधिमण्डल जेठ १८ गते नयाँ दिल्ली प्रस्थान गर्ने कार्यक्रम रहेको छ ।
रास्वपा अनुसार प्रतिनिधिमण्डलमा सहमहामन्त्री विपिन आचार्य र विदेश विभाग प्रमुख दीपक बोहरा रहनेछन् । साथै लामिछानेकी पत्नी निकिता पौडेल र स्वकीय सचिव अविनाश आचार्य पनि टोलीमा सहभागी हुनेछन् ।
भ्रमणका क्रममा जेठ १९ गते भाजपा अध्यक्ष नीतिन नवीनले भाजपा मुख्यालयमा लामिछानेलाई स्वागत गर्ने कार्यक्रम तय भएको छ । सो अवसरमा दुई पक्षबीच औपचारिक राजनीतिक संवाद हुने जनाइएको छ ।
त्यसैगरी लामिछानेले भारतका प्रधानमन्त्री नरेन्द्र मोदीसँग पनि भेटवार्ता गर्ने कार्यक्रम रहेको बताइएको छ । भेटको समय भने सार्वजनिक गरिएको छैन । भारतीय विदेशमन्त्री एस. जयशंकरसहित अन्य केही उच्च अधिकारीहरूसँग पनि भेटवार्ता हुने कार्यक्रम तय भएको जनाइएको छ ।
नेपालमा नयाँ सरकार गठन भएपछि यो भ्रमणलाई उच्चस्तरीय राजनीतिक कूटनीतिक भेटका रूपमा हेरिएको छ । भारतले विगतदेखि नै नेपालका विभिन्न राजनीतिक दलका नेताहरूलाई औपचारिक भ्रमणका लागि निमन्त्रणा गर्दै आएको छ । यसअघि पूर्वप्रधानमन्त्री शेरबहादुर देउवा र पुष्पकमल दाहालले पनि भाजपाको निमन्त्रणामा भारत भ्रमण गरिसकेका छन् ।
प्रतिनिधिमण्डल जेठ २० गते स्वदेश फर्किने कार्यक्रम रहेको रास्वपाले जनाएको छ ।
