लहान नगरपालिका–२२ जहदी गमहरियाका दलित सुकुम्बासी परिवारहरूले पक्की घर पाएका छन् ।
नगरपालिकाले मंगलबार यहाँका २४ दलित सुकुम्बासी परिवारलाई पक्की घर हस्तान्तरण गरेको हो । घर पाउनेमध्ये अधिकांश अति विपन्न मुसहर, रामलगायत दलित समुदायका परिवार रहेका छन् । उनीहरू विगतदेखि फुसको घरमा बस्दै आएका थिए । सोही जग्गामा नगरपालिकाले ‘सुरक्षित आवास कार्यक्रम’ अन्तर्गत उनीहरूका लागि पक्की घर निर्माण गरिदिएको हो ।
नगरपालिका र ह्याभिटेट फर ह्युम्यानिटी नेपालको संयुक्त लगानीमा निर्माण गरिएका घरमा दुई वटा बस्ने कोठा र एउटा भान्सा कोठा रहेको छ । घरको छानामा जस्ता लगाइएको छ भने भित्ता बाँसको प्रयोग गरी प्लास्टर गरिएको छ ।
नगरपालिकाका अनुसार घर निर्माणमा नगरपालिकाको ८२ लाख ८५ हजार ५ सय १५ रुपैयाँ, ह्याभिटेट फर ह्युम्यानिटी नेपालको २० लाख ३५ हजार रुपैयाँ लगानी रहेको छ । साथै लाभग्राहीहरूको २५ लाख ७१ हजार ४ सय ५९ रुपैयाँ बराबरको श्रमदान तथा भवानी एकीकृत विकास केन्द्रको प्राविधिक सहयोग रहेको जनाइएको छ ।
नगरपालिकाका अनुसार यी घरहरूको आयु ३० वर्षभन्दा बढी हुने अनुमान गरिएको छ । केही दिनअघि मात्रै लहान नगरपालिका–१३ का २० दलित सुकुम्बासी परिवारलाई पनि यस्तै घर हस्तान्तरण गरिएको थियो । नगरपालिकाले अन्य स्थानमा समेत यस्ता सुरक्षित आवास निर्माण कार्यलाई निरन्तरता दिइरहेको जनाएको छ ।
