डेढ महिनादेखि धारामा पानी नआउँदा स्थानीयवासी समस्यामा

प्रदेश

गृहपृष्ठ
प्रदेश
डेढ महिनादेखि धारामा पानी नआउँदा स्थानीयवासी समस्यामा

डेढ महिनादेखि धारामा पानी नआउँदा स्थानीयवासी समस्यामा

वीरगंज सिटी शुक्रबार, जेठ २२, २०८३

खानेपानीको पाइप जडान कार्यमा ढिलाइ हुँदा लहानका उपभोक्ता खानेपानी अभावको समस्यामा परेका छन् ।

फागुन महिनापछि हातेकलले पानी दिन छाडेपछि धाराको पानीमा निर्भर स्थानीयवासी समस्यामा परेका हुन् । लहान नगरपालिका–१ का गोविन्द यादवले झण्डै डेढ महिनादेखि धारामा पानी आउन छाडेको बताउनुभयो । उहाँले खानेपानीको समस्या समाधानका लागि नेपाल खानेपानी संस्थानमा पटक–पटक धाउँदा पनि कुनै सुनुवाइ नभएको गुनासो गर्नुभयो ।

यो समस्या गोविन्द यादवको मात्र नभई लहान–१ को नयाँ बसपार्कदेखि पडरियासम्मका करिब एक सय घरधुरीले भोगिरहेका छन् । लहान नगरपालिका–८ का केही घरधुरीमा समेत यस्तै समस्या देखिएको स्थानीयले बताएका छन् ।

धारा जडान भएपछि खानेपानी समस्या अन्त्य हुने अपेक्षा गरेका स्थानीय अहिले निराश बनेका छन् । स्थानीय प्रविणकुमार महतोले एक–दुई दिनको समस्या सहन सकिए पनि महिनौँसम्म पानी नआउँदा दैनिक जीवन कष्टकर बनेको बताउनुभयो । उहाँले कार्यालय धाउँदा–धाउँदै हैरान भइसक्दा पनि समस्या समाधान हुन नसकेको गुनासो गर्नुभयो ।

लहान नगरपालिका–५ की अप्सना खातुनले हातेकलले पानी दिन छाडेपछि खानेपानी, नुहाउने तथा लुगा धुने कामका लागि छिमेकीको भर पर्नुपरेको बताउनुभयो । उहाँले एक महिनासम्म छिमेकीको सहयोगमा काम चलाए पनि अहिले उनीहरूलाई नै पानीको अभाव हुन थालेको भन्दै धारा जडान गरिदिन पटक–पटक आग्रह गर्दा पनि सुनुवाइ नभएको बताउनुभयो ।

नेपाल खानेपानी संस्थान लहानका प्रमुख राकेश गोइतले कञ्चनपुर–कमला चार लेन सडक निर्माणअन्तर्गत पुराना पाइप मर्मत गर्न नसकिने भएपछि नयाँ पाइप जडान गर्ने सहमति भएको जानकारी दिनुभयो । उहाँका अनुसार दिव्या कन्स्ट्रक्सन, लहान–३ ले ठेक्का लिए पनि काम समयमै अघि नबढ्दा समस्या उत्पन्न भएको हो ।

गोइतले ठेकेदार रमानन्द बरयैतसँग केही दिनदेखि सम्पर्क हुन नसकेकाले काम प्रभावित भएको बताउँदै समस्या छिट्टै समाधान गर्ने प्रयास भइरहेको जानकारी दिनुभयो ।

कञ्चनपुर–कमला पश्चिमी खण्डका निर्देशक उज्ज्वल श्रेष्ठले पाइप जडानको काम सात दिनभित्र सम्पन्न गर्ने लक्ष्य रहे पनि विभिन्न कारणले ढिलाइ भएको बताउनुभयो । उहाँले समस्या समाधानका लागि सम्बन्धित निकायसँग शीघ्र समन्वय गरिने जानकारी दिनुभयो ।

<h2 style="text-align: justify;"><a href="https://www.youtube.com/@Birgunjcityofcl"><strong>भिडियाे सामाग्री</strong></a></h2>

प्रकाशित मिति: शुक्रबार, जेठ २२, २०८३ ११:३८

वीरगंज सिटीमा प्रकाशित सामग्रीबारे कुनै पनि प्रतिक्रिया, सल्लाह–सुझाव वा कुनै सामग्री प्रकाशित गराउनुपरेमा [email protected] वा [email protected] मा पठाउन सक्नुहुनेछ।