जेन जि पर्साको टोलीले रसुवा र नुवाकोटमा बाढीबाट प्रभावित परिवारसँग प्रत्यक्ष भेटघाट गरी उनीहरूको अवस्था तथा समस्याबारे जानकारी लिँदै राहत सामग्री हस्तान्तरण गरेको छ ।
जेन जि पर्साका संयोजक विशेष साहको नेतृत्वमा पुगेको टोलीले बाढीपीडितहरू बसोबास गरिरहेको स्थानमै पुगेर राहत सामग्री वितरण गरेको हो । उक्त स्थानमा हाल करिब ३०० जना बाढीपीडित बसोबास गरिरहेको जनाइएको छ ।
पीडित परिवारसँग प्रत्यक्ष भेट गरी उनीहरूको तत्कालीन आवश्यकता र अवस्थाबारे जानकारी लिएपछि जेन जि पर्साले चामल, चिउरा, बिस्कुट, फ्रुटी लगायतका खाद्यान्न तथा आवश्यक राहत सामग्री हस्तान्तरण गरेको जनाएको छ।
राहत सामग्री संकलन तथा व्यवस्थापनमा सहयोग गर्ने सम्पूर्ण वीरगन्जवासी तथा पर्सावासीप्रति जेन जि पर्साले आभार व्यक्त गरेको छ ।
जेन जि पर्साले बाढीपीडित परिवारको वास्तविक अवस्था बुझ्दै आगामी दिनमा पनि आफ्नो क्षमताले भ्याएसम्म सहयोग गर्ने जनाएको छ । साथै, पीडितका आवश्यक विषयमा सम्बन्धित निकायसँग पहल तथा समन्वय गर्ने प्रतिबद्धता जनाएको छ ।
‘पीडितको पीडा बुझ्ने, आवश्यकतामा साथ दिने र संकटमा सहयोग गर्ने’ उद्देश्यसहित जेन जि पर्साले मानवीय सहयोगको अभियानलाई निरन्तरता दिएको जनाएको छ ।
भिडियाे सामाग्री
