वीरगंज । पर्साको वीरगजमा रहेको क्यासिनोमा नेपाली नागरिक प्रवेश गरी जुवा खेलिरहेको आरोपमा नेपाल प्रहरीका एक इन्स्पेक्टर र गाउँपालिका अध्यक्षसहित आठ जना पक्राउ परेका छन्। पक्राउ पर्नेमा इलाका प्रहरी कार्यालय पोखरीयाका प्रमुख तथा इन्स्पेक्टर प्रदिप पौडेल, सखुवाप्रसौनी गाउँपालिकाका गाउँपालिका अध्यक्ष ३६ वर्षीय जसवन्त यादव, सोही ठाउँका ३० वर्षीय चन्दन सहनी र वीरगंज महानगरपालिका–११ का ३९ वर्षीय ओमप्रकाश बैठा रहेका छन्।
प्रहरीका अनुसार वीरगंज महानगरपालिका–१४ गण्डकस्थित गोल्डेन फिंगर गेमिङ जोन प्रालि नामक क्यासिनोमा नेपाली नागरिक प्रवेश गरी जुवा खेलिरहेको सूचनाका आधारमा उनीहरूलाई पक्राउ गरिएको हो।
प्रहरीले उनीहरू क्यासिनोभित्र प्रवेश गरी जुवा खेलिरहेको अवस्थामा पक्राउ गरिएको जनाएको छ। घटनामा पक्राउ परेका व्यक्तिमध्ये गाउँपालिका अध्यक्षसमेत रहेकाले प्रहरीको कारबाहीले स्थानीय तहका जनप्रतिनिधिको क्यासिनो प्रवेश र जुवामा संलग्नताको विषयलाई समेत चर्चामा ल्याएको छ।
प्रहरीले जुवा खेल्ने आरोपमा नेपाली नागरिकलाई मात्रै नभई उनीहरूलाई क्यासिनोमा प्रवेश गराएको आरोपमा क्यासिनोका चार जना कर्मचारीलाई समेत पक्राउ गरेको छ।
त्यसैगरी पक्राउ पर्ने क्यासिनोका कर्मचारीमा वीरगंज महानगरपालिका–१४ का २८ वर्षीय विजयकुमार पटेल, वीरगंज महानगरपालिका–२५ का ३१ वर्षीय दिनेशकुमार पटेल, महोत्तरीको पिपरा गाउँपालिका–५ का ४९ वर्षीय जयदेव साह र वीरगञ्ज महानगरपालिका–१२ का ५० वर्षीय प्रदेशी साह रहेका छन्।
प्रहरीका अनुसार क्यासिनोमा नेपाली नागरिकको प्रवेशसम्बन्धी कानुनी व्यवस्थाविपरीत उनीहरूलाई प्रवेश गराएको आरोपमा कर्मचारीहरूलाई नियन्त्रणमा लिइएको हो।
क्यासिनोमा सर्वसाधारण नेपालीको प्रवेशलाई लिएर कानुनी व्यवस्था रहे पनि त्यसको कार्यान्वयनमाथि पटक–पटक प्रश्न उठ्दै आएको छ। पछिल्लो घटनामा भने कानुन कार्यान्वयन गर्ने निकायमै कार्यरत प्रहरी इन्स्पेक्टर र स्थानीय तहका सरकार प्रमुख नै क्यासिनोमा पक्राउ परेपछि घटना थप चासोको विषय बनेको छ।
प्रहरी संगठनमा कार्यरत अधिकृत नै क्यासिनोमा जुवा खेलिरहेको आरोपमा पक्राउ पर्नुले प्रहरी आचारसंहिता तथा जिम्मेवारीमाथि पनि प्रश्न उठाएको छ। त्यस्तै, गाउँपालिकाका अध्यक्ष नै क्यासिनोमा पक्राउ परेपछि जनप्रतिनिधिको आचरण र सार्वजनिक पदको मर्यादाको विषय पनि बहसमा आएको छ।
यद्यपि, पक्राउ परेका व्यक्तिहरूले वास्तवमा के उद्देश्यले क्यासिनो प्रवेश गरेका थिए, जुवा खेलमा उनीहरूको संलग्नता कस्तो थियो र क्यासिनोका कर्मचारीले उनीहरूलाई कुन प्रक्रियाबाट प्रवेश गराएका थिए भन्ने विषय अनुसन्धानपछि मात्र स्पष्ट हुने जिल्ला प्रहरी कार्यालय पर्साले जनाएको छ।
वीरगंजमा भारतीय सीमासँग जोडिएको क्षेत्र भएकाले क्यासिनो व्यवसाय सञ्चालन हुँदै आएको छ। विदेशी नागरिकलाई लक्षित गरी सञ्चालन हुने क्यासिनोमा नेपाली नागरिक प्रवेश गर्ने गरेको गुनासो पनि बेलाबेलामा उठ्दै आएको छ।
पछिल्लो घटनाले क्यासिनोभित्र नेपाली नागरिकको प्रवेश रोक्नुपर्ने जिम्मेवारी बोकेका सञ्चालक तथा कर्मचारीको निगरानी प्रणालीमाथि समेत प्रश्न खडा गरेको हो।
