वीरगञ्ज महानगरपालिकाको शिक्षा शाखामा जिम्मेवारी हेरफेरको विषयलाई लिएर विवाद चर्किएको छ ।
शिक्षा प्रमुख आनन्द लामिछाने कार्यालयमा नबसेर शिक्षा शाखाकाे नबस्ने गरेकाे सेवाग्राहिले गुनासाे गरेका छन् । केही दिनअघि लामिछानेले राजीनामा दिएको तथा सरुवा भएको भन्दै विभिन्न माध्यमबाट समाचार सार्वजनिक भएपछि उनले त्यसको खण्डन गरेका थिए । तर महानगरकाे समन्वयमा नरहेर उनले उल्टै महानगरपालिकाकाे विरूद्धमा लागेकाे भन्दै वीरगंज महानगरपालिकाले विज्ञप्ति मार्फत जानकारी गराएका थिए ।
यता लामिछानेले आफूलाई जानकारी नै नदिई आफ्नो जिम्मेवारी अरूलाई दिइएको घटनाले आफू दुःखी भएका कारण केही समयदेखि आफ्नो कार्यकक्षको कुर्सीमा नबसेको उनले स्पष्ट पारेका छन् । यद्यपि, आफ्नो जिम्मेवारीबाट भने आफू अलग नभएको उनको दाबी छ । शिक्षा शाखाभित्र देखिएको यो विवादको प्रत्यक्ष असर महानगरपालिकाका विद्यालय तथा शिक्षा प्रशासनमा पर्न सक्ने भन्दै स्थानीयवासीले चिन्ता व्यक्त गरेका छन् ।
स्थानीयका अनुसार शिक्षा क्षेत्रजस्तो संवेदनशील शाखामा नेतृत्व र जिम्मेवारीको विषयमा लामो समयसम्म अन्योल रहँदा विद्यालयका प्रशासनिक तथा शैक्षिक काम प्रभावित हुन सक्छन् ।
यसअघि प्रकाशित समाचारमा शाखा प्रमुख अनुपस्थित हुनुपर्नेमा अन्यथा हुन गएकोमा सच्चयाइएको छ । - समाचार सम्पादक
