रातिको समयमा हुस्सु तथा कुहिरोका कारण हुने सवारी दुर्घटना न्यूनीकरण गर्ने उद्देश्यले रौतहट जिल्लाका विभिन्न सडक खण्डमा रिफ्लेक्ट स्टिकर टाँस्ने अभियान सञ्चालन गरिएको छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैयाबाट तयार भई मधेश प्रदेश प्रहरी कार्यालय, जनकपुरधामबाट स्वीकृत ‘सडक दुर्घटना विरुद्ध युवा–२०८२’ कार्ययोजना अनुसार उक्त अभियान सञ्चालन गरिएको हो ।
जिल्ला रौतहटअन्तर्गत पूर्व–पश्चिम राजमार्गको धनसर पुलदेखि बाग्मती पुलसम्म तथा चन्द्रनिगाहपुर–गौर सडक खण्डको बाल्चनपुर क्षेत्रसम्म सडक डिभिजन कार्यालय चन्द्रनिगाहपुरबाट प्राप्त विभिन्न रङका करिब ३५० फिट बराबरका रिफ्लेक्ट स्टिकर पुल, कल्भर्ट, साइनबोर्ड लगायतका स्थानमा टाँसिएको जिल्ला ट्राफिक प्रहरी कार्यालयले जनाएको छ । जिल्ला ट्राफिक प्रहरी प्रमुख इन्स्पेक्टर राजेन्द्र थापा मगरका अनुसार ईलाका प्रहरी कार्यालय चन्द्रनिगाहपुर र जिल्ला ट्राफिक प्रहरी कार्यालय चन्द्रनिगाहपुरको संयुक्त सहकार्यमा उक्त कार्य सम्पन्न गरिएको हो ।
उनका अनुसार रातिको समयमा उज्यालो दृश्यता कम हुने स्थानमा रिफ्लेक्ट स्टिकर टाँसिँदा सवारी चालकलाई मार्ग पहिचान गर्न सहज हुने र सम्भावित दुर्घटनाको जोखिम कम हुने अपेक्षा गरिएको छ ।
पछिल्ला केही दिनयता रौतहटसहित मधेश प्रदेशमा बिहानैदेखि हुस्सु लाग्ने, चिसो बढ्ने तथा कुहिरोका कारण सवारी साधनको आवागमनमा कठिनाइ भइरहेको अवस्थामा उक्त अभियानलाई प्रभावकारी बनाइएको छ ।
-Recovered@1x_1-1792306880.jpg){kind=logo}
