फ्लाइ दुबईले आगामी असोज ७ गतेदेखि पोखरा–दुबई सिधा व्यावसायिक उडान सेवा सुरु गर्ने भएको छ । विश्वकै प्रमुख हवाई ट्रान्जिट हब मानिने दुबईसँग सिधा हवाई सम्पर्क स्थापित भएसँगै पोखरा अन्तर्राष्ट्रिय हवाई सञ्जालमा जोडिने भएको हो ।
तीन वर्षअघि सञ्चालनमा आएको पोखरा अन्तर्राष्ट्रिय विमानस्थलबाट नियमित अन्तरराष्ट्रिय उडान नहुँदा निराशा बढिरहेका बेला यो उडानलाई दोस्रो व्यावसायिक अन्तरराष्ट्रिय सेवा मानिएको छ । यसअघि सन् २०२५ मार्चमा हिमालय एयरलाइन्सले पोखरा–ल्हासा नियमित उडान सुरु गरे पनि यात्रु संख्या न्यून भएपछि सेवा हाल स्थगित छ । हालसम्म चीन, भारत र भुटानका विभिन्न गन्तव्यमा सीमित चार्टर उडान मात्र हुँदै आएका छन् ।
पोखरा अन्तर्राष्ट्रिय विमानस्थलका महाप्रबन्धक जगन्नाथ निरौलाका अनुसार फ्लाइ दुबईले पोखरा–दुबई–पोखरा उडान तालिका स्वीकृत भएसँगै टिकट बुकिङ खुला गरिसकेको छ । उनले यो उडानलाई पोखराको अन्तर्राष्ट्रिय हवाई पहुँच विस्तारको महत्वपूर्ण उपलब्धि भनेका छन् ।
उनका अनुसार दुबईमार्फत युरोप, अमेरिका, अफ्रिका लगायतका गन्तव्यमा यात्रा गर्ने यात्रुका लागि समय र खर्च दुवै घट्नेछ । साथै पोखरा तथा गण्डकी प्रदेशका पर्यटकीय गन्तव्यमा विदेशी पर्यटकहरू सिधै पोखरा आउन सक्ने वातावरण बन्ने अपेक्षा गरिएको छ ।
पोखरा महानगरपालिकाका प्रमुख धनराज आचार्यले फ्लाइ दुबई र इमिरेट्स एयरलाइन्सबीचको रणनीतिक कोडसेयर साझेदारीले यात्रुहरूलाई ठूलो सुविधा दिने बताए । उनका अनुसार यात्रुहरूले एउटै टिकटमा पोखराबाट दुबई हुँदै युरोप, अमेरिका, अस्ट्रेलियासहित ३०० भन्दा बढी सहरसम्म सहज रूपमा यात्रा गर्न सक्नेछन् ।
इमिरेट्स एयरलाइन्सले दुबई अन्तर्राष्ट्रिय विमानस्थलको टर्मिनल–३ लाई प्रमुख हब बनाएर ६ महादेशका ७६ देश र १४३ भन्दा बढी गन्तव्यमा सेवा दिँदै आएको छ । कोडसेयर प्रणालीमार्फत यात्रुहरूले लगेज ट्रान्सफरदेखि कनेक्टिङ फ्लाइटसम्म सहज सेवा पाउनेछन् । फ्लाइ दुबईले पोखरा–दुबई उडान सञ्चालनका लागि गत जेठ २५ गते नेपाल नागरिक उड्डयन प्राधिकरणबाट अनुमति पाएको थियो । त्यसअघि कम्पनीको प्राविधिक टोलीले पोखरा अन्तर्राष्ट्रिय विमानस्थलमा उच्चस्तरीय सुरक्षा, सेफ्टी तथा सञ्चालन अवस्थाको निरीक्षण गरेको थियो ।
सरकारले आगामी आर्थिक वर्ष २०८३/८४ को नीति तथा कार्यक्रममा अन्तर्राष्ट्रिय वायुसेवा प्रदायकलाई आकर्षित गर्न कूटनीतिक पहल गर्ने उल्लेख गरेको केही समयमै यो उडान सेवा सुरु हुन लागेको हो । विमानस्थलका महाप्रबन्धक निरौलाका अनुसार एयर अरेबियालगायत अन्य अन्तर्राष्ट्रिय एयरलाइन्सहरूले पनि पोखराबाट उडान सञ्चालन गर्न चासो देखाएका छन् । उनका अनुसार पोखराबाट नियमित अन्तर्राष्ट्रिय उडान सुरु भए पर्यटन, अर्थतन्त्र र रोजगारीमा ठूलो योगदान पुग्नेछ ।
पोखरा अन्तर्राष्ट्रिय विमानस्थल नेपालको तेस्रो अन्तर्राष्ट्रिय हवाई प्रवेशद्वार हो। काठमाडौँ केन्द्रित हवाई चाप घटाउँदै पर्यटन विस्तार गर्ने लक्ष्यसहित विमानस्थल निर्माण गरिएको हो । झण्डै २२ अर्ब रुपैयाँ ऋणमा निर्माण भएको यो विमानस्थल सन् २०२३ जनवरी १ मा उद्घाटन गरिएको थियो। हाल यहाँबाट केवल आन्तरिक उडान मात्र सञ्चालन हुँदै आएका छन् ।
पर्यटन व्यवसायीहरूका अनुसार यो सिधा उडानले पोखरा मात्र नभई समग्र गण्डकी प्रदेशको पर्यटन, व्यापार, रोजगारी र आर्थिक गतिविधिमा महत्वपूर्ण प्रभाव पार्नेछ । विशेषगरी मध्यपूर्व, युरोप र अमेरिकासँग जोडिने यात्रुहरूका लागि यो सेवा निकै उपयोगी हुने अपेक्षा गरिएको छ ।
