दोधारा चाँदनी जोड्ने झोलुंगे पुलमा साढे ७ करोड रुपैयाँ बराबरको क्षति भएको प्रारम्भिक अध्ययनबाट देखिएको छ। पुलको सम्पूर्ण भाग मर्मत गर्न भने करिब २० करोड रुपैयाँ आवश्यक पर्ने अनुमान गरिएको छ ।
स्थानीय पूर्वाधार विकास विभाग र सस्पेन्सन ब्रिज डिभिजन कार्यालयको संयुक्त टोलीले गरेको अध्ययनअनुसार पुल भत्किएको भागमा मात्रै साढे ७ करोड रुपैयाँ बराबरको क्षति भएको हो ।
स्थानीय पूर्वाधार विकास विभागका उपमहानिर्देशक कमल अधिकारीका अनुसार पुलका पिलरमा भएको क्षतिको यकिन विवरण भने पानीको बहाव घटेपछि मात्रै थाहा हुनेछ।
‘अझै पिलरमा कति क्षति छ भन्ने एकिन भएको छैन, त्यो पानीको बहाव कम भएपछि मात्रै भन्न सकिन्छ,’ अधिकारीले भने, ‘प्रारम्भिक रूपमा हेर्दा साढे सात करोडको क्षति भएको देखिन्छ ।’
उनका अनुसार अध्ययन टोलीले गत साता नै क्षतिको विवरण र मर्मतका लागि आवश्यक बजेटसहितको प्रतिवेदन पूर्वाधार विकास मन्त्रालयमा बुझाइसकेको छ ।
पुलको भत्किएको भागसँगै अन्य पिलरमा समेत क्षति पुगेकाले सम्पूर्ण संरचनाको सूक्ष्म परीक्षण र मर्मत गर्नुपर्ने देखिएको अधिकारीले बताए। पुलको सबै भाग मर्मत गर्न करिब २० करोड रुपैयाँ लाग्ने प्रारम्भिक अनुमान गरिएको छ ।
अधिकारीका अनुसार भत्किएको पिलरमा पाइलिङ गर्नुपर्ने देखिएको छ भने अन्य क्षतिग्रस्त पिलर र पुलका विभिन्न भागको समेत मर्मत गर्नुपर्नेछ ।
बजेट व्यवस्थापन हुन सके चालु आर्थिक वर्षभित्रै मर्मतको काम सम्पन्न गर्न सकिने उनले बताए। तर, पानीको बहाव घट्नासाथ मर्मत कार्य सुरु गर्नुपर्ने उनको भनाइ छ ।
‘बजेट व्यवस्थापन भएमा यही आर्थिक वर्षभित्रै मर्मतको काम सकिन्छ, तर पानीको बहाव कम हुनासाथ काम सुरु गर्न सक्नुपर्छ,’ अधिकारीले भने ।
पुलको मर्मतका लागि आवश्यक बजेट व्यवस्थापन र पानीको बहाव घटेपछि काम सुरु गर्ने विषय अब मुख्य चुनौतीका रूपमा देखिएको छ ।
