मोरङ जिल्ला कारागारमा आफन्तलाई भेट्न जाँदा प्याडभित्र लुकाएर लागुऔषध लैजान खोजेको आरोपमा दुई दिदीबहिनी पक्राउ परेका छन् । सशस्त्र प्रहरीले सुरक्षा जाँचका क्रममा उनीहरूको साथबाट लागुऔषध बरामद गरेपछि नियन्त्रणमा लिएको हो ।
पक्राउ पर्नेमा सुनसरीको धरान उपमहानगरपालिका–११ निवासी मेलिना तामाङ र पूर्णिमा तामाङ रहेका छन् । उनीहरू दिदीबहिनी भएको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले जानकारी दिए ।
उनका अनुसार बिहीबार दिउँसो विराटनगर महानगरपालिका–८ हाटखोलास्थित कारागारको मुख्य प्रवेशद्वारमा खटिएको सुरक्षा टोलीले नियमित जाँचका क्रममा उनीहरूलाई लागुऔषधसहित पक्राउ गरेको हो ।
‘नियमित चेकजाँच गर्दा शंकास्पद देखिएपछि जाँच गर्दा लागुऔषध भेटियो,’ एसपी भण्डारीले भने, ‘ट्याब्लेट र क्याप्सुललाई लगाएको प्याडमा लुकाएर भित्र लैजान खोजेको देखियो ।’
सशस्त्र प्रहरीका अनुसार उनीहरूको साथबाट हरियो रङका २४० थान क्याप्सुल र सुन्तला रङका २४० थान ट्याब्लेट गरी जम्मा ४८० थान लागुऔषध बरामद भएको छ ।
कारागारभित्र उनीहरू कसलाई भेट्न गएका थिए भन्ने विषय प्रहरीले सार्वजनिक गरेको छैन। घटनाबारे थप विवरण आउन बाँकी छ ।
