हालै काठमाडौंमा सम्पन्न नेपाल अन्तर्राष्ट्रिय चलचित्र महोत्सव (निफ) २०२५ मा चलचित्र ‘आँखा’ का मुख्य अभिनेता आर के मेहता ले उत्कृष्ट पुरुष अभिनेताको अवार्ड जितेका छन् ।
नेपाली फिल्म उद्योगका चर्चित कलाकारहरू प्रदीप खड्का, आर्यन सिग्देल, पल शाहलाई पछि पार्दै उनले यो प्रतिष्ठित उपाधि जितेका हुन् । नेपालबाट ओस्कार अवार्डका लागि छनोट भएको ‘शाम्बला’ ले उत्कृष्ट गौतमबुद्ध चलचित्रको अवार्ड प्राप्त गर्दा, उत्कृष्ट राष्ट्रिय फिचर चलचित्रको अवार्ड भने ‘आँखा’ ले नै जित्यो ।
यही चलचित्रका निर्देशक जौन यौञ्जन ले उत्कृष्ट स्क्रिनराइटर को अवार्ड जित्दै महोत्सवमा ‘आँखा’ ले बलियो उपस्थिति जनायो । कैयौं अन्तर्राष्ट्रिय चलचित्र महोत्सवमा छनोट भई अवार्ड जितिसकेको ‘आँखा’ ले लामो संघर्षपछि नेपाली सिनेमामा ऐतिहासिक उपस्थिति जनायो। तर, दुर्भाग्यवश, चलचित्र हलमा प्रदर्शन भएकै दिन काठमाडौंमा आएको बाढीले गर्दा शोहरू रोक्नुपरेको थियो ।
विराटनगरको भट्टाचोकमा जन्मिएका आर के मेहता अभिनय, कराँते, नृत्य, माइम, पेन्टोमाइममा विशेष दक्षता राख्छन् । उनले बाल्यकालमै कराँतेमा ब्ल्याक बेल्ट हासिल गर्दै अन्तर्राष्ट्रिय प्रतियोगितामा नेपाललाई पदक दिलाएका थिए। अभिनयमा गहिरो रुचि राख्ने मेहता रंगमञ्चतर्फ आकर्षित भए र विराट मैथिल नाट्य कला परिषद, विराटनगर गुरुकुल हुँदै शिल्पी थिएटरमा प्रशिक्षण लिएका थिए ।
रंगमञ्चमा ‘महाकन्जुस’, ‘हारजीत’, ‘कोमा’, ‘जीउँदो आकाश’ जस्ता नाटकहरूमा अभिनय र निर्देशन गरिसकेका मेहता एनएसडी ओलम्पिक थिएटर फेस्टिभलमा ‘जीउँदो आकाश’ लिएर अन्तर्राष्ट्रिय मञ्चमा नेपाललाई प्रतिनिधित्व गरिसकेका छन् । थिएटरमार्फत आफ्नो पहिचान बनाउन सफल भएका उनी सिनेमामा आउन चाहन्थे । उनले नेपाली फिल्म ‘रंगेली’ बाट आफ्नो अभिनय यात्रा सुरु गरेका थिए, तर दुर्भाग्यवश, फिल्म बिचैमा बन्द भयो ।
सिनेमामा गहिराइ ल्याउन उनी इटालीको ‘एकाडेमिया डेल आर्टे’ मा भौतिक थिएटर अध्ययन गर्न गए । इटालीमा विभिन्न प्रदर्शनहरू गरेपछि नेपाल फर्किएर उनले आफ्नो नाटक ‘जीउँदो आकाश’ पुनः मञ्चन गरे। नेपाल फर्किएपछि उनलाई निर्देशक जौन योंजनको फिल्म ‘आँखा’ मा मुख्य भूमिका निभाउने अवसर प्राप्त भयो ।
चलचित्र ‘आँखा’ का लागि उनले आफूलाई चरित्रमा ढाल्न विशेष मेहनत गरे । उनले ६ महिनासम्म काठमाडौंको सुकुम्बासी बस्तीमा गएर बस्दै त्यहाँको वास्तविकता अध्ययन गरे। निर्देशक र सह-कलाकारहरूसँग मिलेर लामो वर्कशप गरे। चरित्रलाई जीवन्त बनाउन उनले १५ किलो तौल घटाए ।
आर के मेहता अभिनय मात्र होइन, पर्दा पछाडिको काममा पनि उत्तिकै सक्रिय छन् । उनले फिल्मको सेट निर्माण, लाइट सेटअप, र कलाकारहरूको तयारीमा समेत योगदान दिए। स्क्रिप्ट अध्ययनमा समय खर्चिए, संवादको गहिराइ बुझ्न सामाजिक अध्ययन गरे, एक्सप्रेसन सुधार्न रातभर नसुती अभ्यास गरे ।
उनी अभिनीत ‘आँखा’ मा दमदार अभिनय गर्दै नेपाल अन्तर्राष्ट्रिय चलचित्र महोत्सव २०२५ मा उत्कृष्ट पुरुष अभिनेता को अवार्ड जित्न सफल भए । उनको कठोर मेहनतले रंग ल्याएपछि उनी नेपाली सिनेमा उद्योगका लागि एक प्रेरणादायी कलाकार बनेका छन् ।
