सप्तरीको राजगढ गाउँपालिका–२ मा मदिरा तस्करी नियन्त्रणका लागि प्रहरीले सञ्चालन गरेको सर्च अपरेशनका क्रममा झडप हुँदा एक स्थानीयको मृत्यु भएको छ ।
मृतकको पहिचान स्थानीय लालु यादवको रूपमा भएको छ । मधेस प्रदेश प्रहरी प्रमुख डीआईजी उमाप्रसाद चतुर्वेदीका अनुसार नेपाल–भारत सीमा क्षेत्र हुँदै व्यापक मात्रामा मदिरा भण्डारण तथा तस्करी भइरहेको सूचनाका आधारमा गएराति प्रहरी टोली परिचालन गरिएको थियो ।
प्रहरीको भनाइ अनुसार अपरेशनका क्रममा तस्कर समूहले सुरक्षाकर्मीमाथि घेरा हाल्दै ढुंगा प्रहार गरेपछि आत्मरक्षाका लागि ७ राउण्ड गोली प्रहार गर्नुपरेको थियो ।
गोली लागेर गम्भीर घाइते भएका यादवको उपचारका लागि अस्पताल लैजाँदै गर्दा बाटोमै मृत्यु भएको प्रहरीले जानकारी दिएको छ ।
घटनास्थलबाट प्रहरीले विभिन्न ब्राण्डका ८० कार्टुन मदिरा बरामद गरेको छ ।
प्रहरीले सीमा क्षेत्रमा भइरहेको मदिरा तस्करी नियन्त्रणका लागि अपरेशनलाई अझ कडाइका साथ अगाडि बढाइने जनाएको छ ।
