पर्सा जिल्लामा झाडापखाला तथा हैजाको प्रकोप फैलिरहँदा वीरगन्ज महानगर क्षेत्रमा संक्रमणको दर केही स्थिर देखिए पनि पोखरिया नगरपालिकामा भने तीव्र गतिमा बढ्न थालेको छ ।
वीरगन्ज महानगरपालिकाले शुक्रबार साँझ ६ बजेसम्मको विवरण सार्वजनिक गर्दा यहाँ कुल १ सय ५३ जना हैजा संक्रमित फेला परेका छन् । बिहीबारसम्म यो संख्या १ सय ४३ थियो । २४ घण्टाको अवधिमा थप १० संक्रमित पुष्टि भएका हुन् ।
उता पोखरियामा पनि संक्रमित संख्या बढ्दै गएको छ । पोखरिया अस्पतालका मेडिकल सुपरिटेन्डेन्ट डा. आनन्द रौनियारका अनुसार, पछिल्ला चार दिनमा अस्पतालमा आएका २५ मध्ये १५ जनामा हैजा पुष्टि भएको छ । शुक्रबार साँझसम्म पोखरियामा कुल संक्रमित संख्या १५ पुगेको छ ।
डा. रौनियारले हाल अस्पतालमा २ जना संक्रमित भर्ना रहेको र १३ जना डिस्चार्ज वा अन्यत्र रिफर भइसकेको जानकारी दिए ।
यसरी वीरगन्ज र पोखरियामा गरी पर्सा जिल्लाभर हालसम्म कुल १ सय ६८ हैजा संक्रमित फेला परेका छन् । वीरगन्ज महानगरपालिकाले सार्वजनिक गरेको तथ्यांकअनुसार, यहाँका संक्रमितमध्ये ५९ जना विभिन्न अस्पतालमा उपचाररत छन् भने ९४ जना निको भई घर फर्किसकेका छन् ।
जिल्ला स्वास्थ्य संकट व्यवस्थापन समितिका प्रवक्ता सुमनचन्द्र ठाकुरका अनुसार, संक्रमित पुष्टि आरडीटी परीक्षणमार्फत गरिएको हो । उनले भने, “वीरगन्जका अधिकांश संक्रमित वडा नं. ३, ११, १२, १३ र १६ का रहेका छन् ।”
यसैबीच वीरगन्जका विभिन्न अस्पतालमा हालसम्म ६ सय ९७ जना झाडापखाला तथा हैजाका बिरामी सम्पर्कमा आएका छन् । तीमध्ये ५ सय ४ जना उपचारपछि घर फर्किएका छन् भने १ सय ९३ अझै अस्पतालमै उपचाररत छन् ।
