बाराको जीतपुरसिमरा उपमहानगरपालिकामा लागुऔषध दुव्र्यसन, साइबर अपराध तथा आत्महत्या न्यूनीकरणसम्बन्धी दुई दिने सचेतनामूलक कार्यक्रम सम्पन्न भएको छ ।
उपमहानगरपालिकाको आयोजना, लुमन्ती आवासका लागि सहयोग समूहको सहकार्य तथा इलाका प्रहरी कार्यालय सिमरा र यश नेपालको सहजीकरणमा वडा नं. ९ र १९ मा कार्यक्रम सञ्चालन गरिएको हो ।
बढ्दो लागुऔषध प्रयोग, अनलाइन ठगी, साइबर दुव्र्यवहार तथा मानसिक तनावका कारण आत्महत्याका घटनामा वृद्धि भइरहेका बेला स्थानीय समुदायलाई सचेत गराउने उद्देश्यले कार्यक्रम आयोजना गरिएको हो ।
कार्यक्रममा इलाका प्रहरी कार्यालय सिमरा तथा मातहतका इलाका प्रहरी कार्यालय जीतपुरका प्रहरी प्रतिनिधिहरूले प्रशिक्षण दिएका थिए । उनीहरूले लागुऔषधको दुष्परिणाम, कानुनी व्यवस्था, किशोर–किशोरीमा पर्ने असर तथा यसबाट बच्ने उपायबारे जानकारी गराएका थिए ।
त्यसैगरी, साइबर अपराधअन्तर्गत सामाजिक सञ्जालमार्फत हुने ठगी, नक्कली (फेक) आईडी प्रयोग, अनलाइन ब्ल्याकमेल तथा बैंकिङ फ्रडजस्ता विषयमा पनि विस्तृत जानकारी प्रदान गरिएको थियो ।
यश नेपालका प्रतिनिधिहरूले मानसिक स्वास्थ्य, तनाव व्यवस्थापन, पारिवारिक संवादको महत्त्व तथा आत्महत्या रोकथामका उपायबारे सहजीकरण गरेका थिए । उनीहरूले समस्या लुकाएर बस्नुको सट्टा परिवार, साथीभाइ वा सम्बन्धित निकायसँग खुला संवाद गर्नुपर्नेमा जोड दिएका थिए ।
कार्यक्रममा वडा नं. ९ र १९ का जनप्रतिनिधि, शिक्षक, विद्यार्थी, अभिभावक, महिला समूह, युवा क्लब तथा स्थानीयवासीहरूको उल्लेखनीय सहभागिता रहेको थियो । सहभागीहरूले यस्ता कार्यक्रमले समाजमा सकारात्मक प्रभाव पार्ने र युवापुस्तालाई गलत बाटोतर्फ जानबाट रोक्न सहयोग पुग्ने बताएका छन् ।
स्थानीय तहले आगामी दिनमा पनि यस्ता जनचेतनामूलक कार्यक्रमलाई निरन्तरता दिने जनाएको छ ।
