अख्तियार दुरुपयोग अनुसन्धान आयोग ले नेपाल विद्युत प्राधिकरणका एक वितरण केन्द्र प्रमुखविरुद्ध विशेष अदालत काठमाडौंमा भ्रष्टाचार आरोपपत्र दायर गरेको छ ।
आयोगले महेन्द्र कुमार दास विरुद्ध घुस लिएको पुष्टि भएपछि मुद्दा दायर गरेको हो । उनी नेपाल विद्युत प्राधिकरण अन्तर्गत कञ्चनपुर वितरण केन्द्र सप्तरीका प्रमुखका रूपमा कार्यरत थिए । आयोगका प्रवक्ता सुरेश न्यौपाने का अनुसार चार्जिङ स्टेसनको ट्रान्सफर्मर राखी विद्युत लाइन जडान गरिदिने प्रयोजनका लागि सेवाग्राहीसँग घुस मागिएको उजुरी परेको थियो । उजुरीका आधारमा अख्तियारको इटहरी कार्यालयबाट खटिएको टोलीले उनलाई सेवाग्राहीबाट एक लाख ४० हजार रुपैयाँ घुस लिइसकेको अवस्थामा नियन्त्रणमा लिएको थियो ।
अनुसन्धानका क्रममा दासले नियमानुसार सम्पन्न भइसकेको कार्यका लागि समेत घुस मागेको र रकम लिएको तथ्य प्रमाणित भएको आयोगले जनाएको छ । आयोगले उनलाई भ्रष्टाचार निवारण ऐन, २०५९ अन्तर्गत एक लाख ४० हजार रुपैयाँ बिगो कायम गर्दै बिगोअनुसार जरिवाना र कैद सजायको मागसहित विशेष अदालतमा आरोपपत्र दायर गरेको हो ।
