बारा | भक्तपुरको बोडेस्थित कृषि विकास बैंकको केन्द्रीय तालिम प्रतिष्ठानमा रहेको होल्डिङ सेन्टरमा मृत फेला परेका ५७ वर्षीय हीरालाल पासवानका परिवारलाई सरकारले तत्काल जमिन उपलब्ध गराउने भएको छ ।
सरकार र पीडित पक्षबीच पाँचबुँदे सहमति भएपछि पासवान परिवार मृतकको शव पोस्टमार्टम गरी दाहसंस्कार गर्न तयार भएको हो ।
सहमति अनुसार सरकारले मृतकको परिवारलाई बाराको सुवर्ण गाउँपालिकामा सुकुम्बासी परिवारका लागि उपलब्ध हुने जमिन तत्काल प्रदान गर्नेछ । त्यस्तै, परिवारका दुई सदस्यलाई रोजगारीको व्यवस्था, बालबालिकालाई विद्यालय तहसम्म निःशुल्क शिक्षा तथा परिवारका सदस्यको औषधोपचारको व्यवस्था गर्न सरकार सहमत भएको छ ।
सहमतिपत्रमा पीडित पक्षका तर्फबाट मृतकका छोरा रवि पासवान र बुहारी अञ्जली पासवानले हस्ताक्षर गरेका छन् । सरकारी पक्षबाट अधिकारसम्पन्न बागमती सभ्यता एकीकृत विकास समितिका कार्यकारी अध्यक्ष आनन्द सिंह भाट, भूमि समस्या समाधान समितिका सदस्य अमिर न्यौपाने र उपसचिव सञ्जीव साहले हस्ताक्षर गरेका छन् ।
थापाथलीस्थित बागमती नदी किनारको सुकुम्बासी बस्तीबाट विस्थापित भएपछि पासवान परिवार बोडेस्थित होल्डिङ सेन्टरमा बस्दै आएको थियो । डोजर प्रयोग गरी सुकुम्बासी बस्ती भत्काइएपछि उनीहरूलाई सुरुमा कीर्तिपुरस्थित राधास्वामी सत्संग केन्द्रको होल्डिङ सेन्टरमा राखिएको थियो ।
तर गत असार २७ गते कीर्तिपुरस्थित होल्डिङ सेन्टरमा बाढी पसेपछि सरकारले पासवान परिवारसहित त्यहाँ रहेका विस्थापितलाई बोडेस्थित होल्डिङ सेन्टरमा स्थानान्तरण गरेको थियो ।
बोडेस्थित होल्डिङ सेन्टरमा हीरालाल पासवान मृत अवस्थामा फेला परेपछि परिवारले घटनाको छानबिन तथा उचित क्षतिपूर्तिको माग गर्दै शव बुझ्न अस्वीकार गरेको थियो । सरकारसँग पाँचबुँदे सहमति भएपछि भने परिवार शव पोस्टमार्टम तथा दाहसंस्कारका लागि तयार भएको हो ।
