वीरगञ्ज । तीन वर्षीया बालिका गरिमा चौधरीको बलात्कारपछि हत्या भएको घटनालाई लिएर बारामा दुई दिनदेखि जारी आन्दोलन पाँचबुँदे सहमतिपछि स्थगित भएको छ ।
पीडित परिवार, स्थानीय जनप्रतिनिधि, राजनीतिक दलका प्रतिनिधि तथा जिल्ला सुरक्षा समितिका पदाधिकारीबीच बिहीबार राति पथलैयास्थित सशस्त्र प्रहरी बलको प्राविधिक तालिम शिक्षालयमा भएको लामो छलफलपछि सहमति जुटेको हो । सहमतिसँगै आन्दोलनरत पक्षले गर्दै आएका सडक अवरोध तथा प्रदर्शनका कार्यक्रम तत्कालका लागि फिर्ता लिएको छ ।
सहमति अनुसार पीडित परिवारलाई उचित राहत तथा रोजगारीको व्यवस्था गर्न स्थानीय तहको सहभागितामा गृह मन्त्रालयसमक्ष सिफारिस गरी आवश्यक पहल गरिनेछ ।
त्यस्तै, घटनामा पक्राउ परेका व्यक्तिमाथि अनुसन्धानलाई निरन्तरता दिँदै थप व्यक्तिको संलग्नता पुष्टि भए उनीहरूलाई समेत कानुनी दायरामा ल्याएर कडा कारबाही गर्ने सहमति भएको छ ।
घटनाको अनुसन्धान र बालिकाको खोजीका क्रममा प्रहरीबाट भएको भनिएको लापरबाहीको विषयमा समेत प्रशासनले आवश्यक कदम चाल्ने प्रतिबद्धता जनाएको छ । इलाका प्रहरी कार्यालय सिमरामा कार्यरत रहँदा खोजी तथा अनुसन्धानमा बेवास्ता गरेको पाइए सम्बन्धित सुरक्षाकर्मीमाथि आवश्यक कारबाही गरिने सहमति भएको बताइएको छ ।
यसैगरी, जिल्लाको शान्ति–सुरक्षा थप प्रभावकारी र भरपर्दो बनाउन जिल्ला सुरक्षा समितिले आवश्यक सुरक्षा रणनीति अवलम्बन गर्ने सहमति भएको छ ।
गत साउन ३१ गतेदेखि बेपत्ता रहेकी गरिमा चौधरीको शव भदौ २ गते जीतपुरसिमरा उपमहानगरपालिका–१ स्थित एक खाली घरमा फेला परेको थियो । शव फेला परेपछि घटनामा संलग्नलाई तत्काल पक्राउ गरी कडा कारबाही गर्नुपर्ने तथा बालिकाको खोजीमा लापरबाही गर्ने प्रहरी अधिकारीलाई निलम्बन गर्नुपर्ने माग राख्दै स्थानीयवासी आन्दोलनमा उत्रिएका थिए ।
आन्दोलनका क्रममा वीरगञ्ज–पथलैया सडकखण्ड अवरुद्ध हुँदा यातायातसमेत प्रभावित भएको थियो । पाँचबुँदे सहमतिपछि भने अवरुद्ध सडक सञ्चालनमा आएको छ ।
स्थानीयवासीले घटनाको निष्पक्ष अनुसन्धान गरी दोषीलाई कडा कारबाही गर्नुपर्ने माग गर्दै आएका छन् । सहमति कार्यान्वयनमा प्रशासनले देखाउने सक्रियताले आगामी दिनमा आन्दोलनको अवस्था निर्धारण गर्ने बताइएको छ ।
