रसुवाको भोटेकोशी नदीमा आएको बाढीपछि हराइरहेका मधेस प्रदेशका १७१ जनामध्ये हालसम्म २२ जना परिवारको सम्पर्कमा आएका छन् ।
मधेस प्रदेश प्रहरी कार्यालय जनकपुरधामका प्रवक्ता एवं वरिष्ठ प्रहरी उपरीक्षक प्रभुप्रसाद ढकालका अनुसार बाढीपछि प्रदेशका विभिन्न जिल्लाका १७१ जना सम्पर्कविहीन रहेको विवरण प्राप्त भएकोमा २२ जना टेलिफोनमार्फत सम्पर्कमा आएका हुन् । प्रहरीका अनुसार हालसम्म सप्तरीका ४५, पर्साका ३९, रौतहटका १७, बाराका २३, सर्लाहीका १५, महोत्तरीका १७, धनुषाका पाँच र सिरहाका १० जना सम्पर्कविहीन रहेको विवरण प्राप्त भएको छ ।
सम्पर्कविहीनमध्ये आज बिहानसम्म पर्साको पोखरिया नगरपालिका–५ का ओजिर अन्सारी, वीरगञ्जमा बस्दै आएका सिन्धुलीका ज्ञानबहादुर थिङ, बाराको कलैया उपमहानगरपालिका–२२ का सत्यम राम, जितपुरसिमरा उपमहानगरपालिका–१२ का रोजितकुमार साह र स्वर्ण गाउँपालिका–३ का रुपेश गुप्ता परिवारको सम्पर्कमा आएका छन् । त्यस्तै, रौतहटको गढीमाई नगरपालिका–७ का मोविदा खातुन, सकिना खातुन र सलमान अन्सारी तथा ईशनाथ नगरपालिका–४ का सेख मजिद पनि सम्पर्कमा आएका छन् । चन्द्रपुर नगरपालिकाका पवित्रा नेपाल सिलवाल र सम्राट सिलवालसमेत परिवारको सम्पर्कमा आएको प्रहरीले जनाएको छ ।
सर्लाहीको लालबन्दी नगरपालिका–१ का बृजकिशोर दास, सुनिता दास र श्यामलाल मोक्तान तथा बागमती नगरपालिका–६ का दिपेश थापा पनि सम्पर्कमा आएका छन् । त्यस्तै, महोत्तरीको जलेश्वर नगरपालिका–१ का राकेशकुमार यादव र इञ्जिनियर विपीनकुमार मण्डल तथा धनुषाको सबैला नगरपालिकाका लक्ष्मण मेहता, हंसपुर नगरपालिकाका दयावतीदेवी यादव, विजयकुमार यादव र सुरेश पजियार सम्पर्कमा आएका छन् । सिरहाको गोलबजार नगरपालिका–१० का टार्जन बलम्पाकीसमेत टेलिफोनमार्फत परिवारको सम्पर्कमा आएको वरिष्ठ प्रहरी उपरीक्षक ढकालले जानकारी दिए ।
मधेस प्रदेशका विभिन्न जिल्लाबाट नागरिक सम्पर्कविहीन भएको सूचना आउन थालेपछि प्रहरीले उनीहरूको विवरण सङ्कलन गरी खोजी कार्य अघि बढाएको छ । बाढी तथा पहिरोपछि परिवार र आफन्तसँग सम्पर्क हुन नसकेकाहरूको खोजीका लागि विवरण सङ्कलन भइरहेको प्रहरीले जनाएको छ । रोजगारी, व्यवसाय तथा अन्य कामका लागि मधेसका विभिन्न जिल्लाबाट रसुवा पुगेका नागरिकसमेत बाढीको चपेटामा परेपछि परिवारजन चिन्तित बनेका छन् ।
सम्पर्कविहीन व्यक्तिबारे कुनै जानकारी प्राप्त भएमा सम्बन्धित जिल्ला प्रशासन कार्यालय, प्रहरी कार्यालय तथा स्थानीय प्रशासनलाई जानकारी गराउन वरिष्ठ प्रहरी उपरीक्षक ढकालले आग्रह गरेका छन् ।
