सप्तरीको राजविराज–रूपनी मुख्य सडकखण्डअन्तर्गत मलेठमा सडकको बिचमै रहेको विद्युत् पोलका कारण सवारीसाधन सञ्चालनमा जोखिम बढेको छ।
सडक स्तरोन्नतिको काम सुरु भएको वर्षौँ बितिसक्दा पनि सडकको बिचमा रहेको पोल नहटाइँदा विशेषगरी ठूला सवारीसाधनलाई आवतजावतमा कठिनाइ भएको छ।
राजविराज नगरपालिका–९ अन्तर्गत पर्ने उक्त सडकखण्डमा चार लेनको सडक निर्माण भइरहेको भए पनि निर्माण कार्य अधुरो रहेकाले हाल एकतर्फी रूपमा सवारीसाधन सञ्चालन भइरहेका छन्। सडकमा रहेका खाल्डाखुल्डी, हिलो तथा बिच सडकमा ठडिएको विद्युत् पोलका कारण दुर्घटनाको जोखिम थप बढेको यात्रु तथा सवारीचालकको गुनासो छ।
बस चालक शंकर यादवका अनुसार सडकको बिचमा रहेको पोलले बस तथा ट्रकजस्ता ठूला सवारीसाधनलाई आवतजावतमा समस्या हुने गरेको छ। “सडक साँघुरो छ, त्यसमाथि बिचमै पोल छ। ठूला सवारीसाधन निकाल्दा निकै सावधानी अपनाउनुपर्छ,” उहाँले भन्नुभयो।
स्थानीय मनोज मेहताले सडक स्तरोन्नतिको काम सुरु भएयता अवस्था झनै कठिन बनेको बताउनुभयो। सामान्य वर्षा हुँदा पनि सडक हिलाम्मे भएर पैदल हिँड्नसमेत समस्या हुने गरेको उहाँको भनाइ छ। खाल्डाखुल्डीमा पानी जम्ने र हिलोका कारण सडकको अवस्था पहिचान गर्नसमेत कठिन हुने उहाँले बताउनुभयो।
मोटरसाइकल चालक लोकेन्द्र यादवका अनुसार हिलो, खाल्डाखुल्डी र सडकको बिचमा रहेको विद्युत् पोलका कारण सवारीसाधनलाई साइड दिनसमेत समस्या हुने गरेको छ। “हिलो, खाल्डाखुल्डी र बिच सडकमा विद्युत्को पोल हुँदा साइड पाउनै गाह्रो हुन्छ। अगाडिबाट वा पछाडिबाट आएको सवारीले कतिबेला ठक्कर दिन्छ भन्ने डर हुन्छ,” उहाँले भन्नुभयो।
पोल रहेको स्थानमा सडक घुमाउरोसमेत भएकाले समस्या झनै बढेको रात्री बस चालक रामप्रसाद साहको अनुभव छ। उहाँका अनुसार साँघुरो बाटोमा लामो दूरीका बस तथा मालवाहक ट्रकलाई मोड्न कठिन हुने गरेको छ। रातको समयमा दृश्यता कम हुँदा दुर्घटनाको जोखिम थप बढ्ने उहाँको भनाइ छ।
यसैबीच, सडक डिभिजन कार्यालय लहानले सप्तरीका तीनवटा सडकको निर्माण ठेक्का रद्द गरेको छ। राजविराज–छिन्नमस्ता, राजविराज–रूपनी र राजविराज–हनुमाननगर–भारदह सडक निर्माणको जिम्मेवारी पाएको साह इन्जिनियरिङ कन्स्ट्रक्सन प्रालि, शम्भुनाथसँगको ठेक्का सम्झौता रद्द गरिएको हो।
तोकिएको समयमा निर्माण सम्पन्न हुन नसकेपछि सार्वजनिक खरिद ऐन तथा सम्झौतामा उल्लेखित प्रावधानअनुसार सडक डिभिजन कार्यालयले जेठ ७ गते ठेक्का रद्द गर्ने निर्णय गरेको जनाएको छ।
सडक डिभिजन कार्यालय लहानका सूचना अधिकारी इन्जिनियर शिवनारायणप्रसाद साहका अनुसार सडक लामो समयदेखि जीर्ण अवस्थामा रहेकाले सर्वसाधारणले सास्ती खेप्दै आएका छन्। सडकको खराब अवस्थाका कारण स्वास्थ्य समस्या तथा सवारीसाधन बिग्रिने गुनासोसमेत आउने गरेको उहाँले बताउनुभयो।
