कन्नड सुपरस्टार यश अभिनीत फिल्म ‘टक्सिकः ए फेयरी टेल फर ग्रोन–अप्स’ प्रदर्शनमा आएको दुई साता पूरा भएको छ। सुरुवाती दिनमा शानदार व्यापार गरेको फिल्मको कमाइ भने पछिल्ला दिनमा निरन्तर ओरालो लागेको छ।
अगस्ट २६ मा रिलिज भएको एक्सन–थ्रिलर ग्याङ्स्टर फिल्मले पहिलो दिन भारतमा १०१ करोड १० लाख भारुको ओपनिङ गरेको थियो। बलियो सुरुवातसँगै फिल्मले बक्स अफिसमा ठूलो सफलता हासिल गर्ने अपेक्षा गरिएको थियो। तर दोस्रो सातासम्म आइपुग्दा दैनिक कलेक्सनमा उल्लेख्य कमी देखिएको छ। सैकनिल्कको प्रारम्भिक ट्रेन्ड रिपोर्टअनुसार फिल्मले प्रदर्शनको १४औँ दिन अर्थात् दोस्रो मंगलबार भारतमा करिब ६९ लाख भारु नेट कलेक्सन गरेको छ। त्यसको अघिल्लो दिन सोमबार फिल्मले ७५ लाख भारु कमाएको थियो। यसरी मंगलबारको कमाइमा करिब ८ प्रतिशत गिरावट आएको देखिन्छ।
दुई साताको प्रदर्शनपछि ‘टक्सिक’को भारतमा कुल नेट कलेक्सन करिब २४७ करोड १९ लाख भारु पुगेको छ। भारतमा फिल्मको ग्रस कलेक्सन करिब २९५ करोड २ लाख भारु रहेको बताइएको छ। विदेशी बजारबाट फिल्मले करिब ४३ करोड ३० लाख भारु कमाएको छ। यससँगै फिल्मको विश्वव्यापी ग्रस कलेक्सन करिब ३३८ करोड ३२ लाख भारु पुगेको छ।
फिल्मको कन्नड र हिन्दी संस्करणको प्रदर्शनमा पनि केही फरक देखिएको छ। १४औँ दिन कन्नड संस्करणले करिब ४७ लाख भारु कमाउँदा हिन्दी संस्करणको कलेक्सन करिब २२ लाख भारु रहेको छ।तर अकुपेन्सीको हिसाबमा भने हिन्दी संस्करण अगाडि देखिएको छ। कन्नड संस्करणको कुल अकुपेन्सी १६.५२ प्रतिशत रहँदा हिन्दी संस्करणको अकुपेन्सी २९.६० प्रतिशत पुगेको थियो। हिन्दी संस्करणका रातिका शोमा सबैभन्दा बढी ३५.७७ प्रतिशत अकुपेन्सी देखिएको रिपोर्टमा उल्लेख छ।
यश ग्याङ्स्टर भूमिकामा
गीतु मोहनदासको निर्देशनमा बनेको ‘टक्सिक’को कथा भारत स्वतन्त्र भएपछिको गोवाको पृष्ठभूमिमा आधारित छ । फिल्ममा यश ग्याङ्स्टरको भूमिकामा प्रस्तुत भएका छन्।फिल्ममा यशसँगै कियारा आडवाणी, नयनतारा, हुमा कुरैशी, तारा सुतारिया र रुक्मिणी वसन्तको अभिनय छ। फिल्मको कथा गीतु मोहनदास र यशले संयुक्त रूपमा लेखेका हुन्। यश फिल्मका सह–निर्मातासमेत हुन्। सुरुवाती दिनको आक्रामक व्यापारपछि पछिल्लो समय कलेक्सनमा देखिएको गिरावटले फिल्मको अन्तिम व्यापार कति पुग्छ भन्ने चासो बढाएको छ।
