बाराको जितपुरसिमरा उपमहानगरपालिका–१ स्थित आधाभार जंगलमा उडिरहेको मौरीले टोकेर स्कुटरमा सवार श्रीमान्–श्रीमती घाइते भएका छन् ।
मंगलबार बिहान करिब १०ः५० बजे पिलुवाबाट हेटौंडातर्फ जाँदै गरेको लु.४४ प ३१४४ नम्बरको स्कुटरमा सवार दुवै जनालाई मौरीले टोकेर घाइते बनाएको जिल्ला प्रहरी कार्यालय बाराले जनाएको छ । घाइते हुनेमा मकवानपुरको हेटौंडा उपमहानगरपालिका–१९ निवासी २७ वर्षीय आमोद विक र उनकी २८ वर्षीया श्रीमती प्रमिला कुमारी विक रहेका छन् ।
मौरीको टोकाइबाट घाइते भएका दुवै जनालाई उपचारका लागि सिमरास्थित सिटीस्टार अस्पतालमा भर्ना गरिएको छ। प्रहरीका अनुसार स्कुटर चालक आमोदको अवस्था मध्यम रहेको छ भने पछाडि सवार उनकी श्रीमती प्रमिलाको अवस्था सामान्य रहेको छ ।
घटनाबारे जानकारी प्राप्त हुनासाथ प्रहरी चौकी पथलैयाबाट प्रहरी हवल्दार दीपेन्द्र साहको कमान्डमा प्रहरी टोली घटनास्थलमा खटिएको थियो।
घटनामा संलग्न स्कुटर प्रहरीको नियन्त्रणमा रहेको जिल्ला प्रहरी कार्यालय बाराले जनाएको छ ।
