सप्तरी । गाउँबस्तीका अन्य घरमा दशैंको उज्यालो छाइरहँदा सप्तरीको बोदेबरसाइन नगरपालिका–५, जाँजरस्थित मुसहर बस्तीका परिवार भने अन्धकारमा बस्न बाध्य भएका छन् । लामो समयदेखि विद्युत् महसुलको बक्यौता नबुझाएको भन्दै नेपाल विद्युत् प्राधिकरणले विद्युत् लाइन काटिदिएपछि बस्तीका स्थानीय १५ दिनदेखि बिजुलीविहीन भएका हुन् ।
दशैंमा घर उज्यालो बनाउने, परिवारसँग बसेर खुसी साटासाट गर्ने र चाडपर्व मनाउने चाहना सबैको हुन्छ । तर आर्थिक अवस्था कमजोर भएका कारण विद्युत् महसुल तिर्न नसकेका मुसहर बस्तीका परिवारका लागि यस वर्षको दशैं अन्धकारमै बितिरहेको छ ।
नेपाल विद्युत् प्राधिकरण वितरण केन्द्र बोदेबरसाइनले गत असोज १६ गते बस्तीको विद्युत् लाइन काटेको थियो । स्थानीय रामचन्द्र सदाका अनुसार प्राधिकरणले कुनै पूर्वसूचना नदिई एकैपटक बस्तीका सबै घरको विद्युत् लाइन काटेको हो ।
“विद्युत् प्राधिकरणले विनासूचना एकैपटकमा विद्युत्को लाइन काटिदियो,” उनले भने, “हाम्रो बस्तीका सबैको लाइन काटिएपछि हामी पछिल्लो १५ दिनदेखि अन्धकारमा छौँ ।”
दिनको समयमा खासै समस्या नदेखिए पनि रात परेपछि सामान्य घरायसी काम गर्नसमेत कठिन हुने गरेको स्थानीयको गुनासो छ । मोबाइलको बत्ती बालेर काम गर्नुपर्ने र आवश्यक पर्दा अरूको सहयोग लिनुपर्ने बाध्यता रहेको रामचन्द्रले बताए ।
विद्युत् सेवा बन्द भएपछि मोबाइल चार्ज गर्नसमेत समस्या भएको स्थानीय शम्भु सदाले बताए । “बस्तीमा विद्युत् नहुँदा मोबाइल चार्ज गर्नसमेत अरूको सहयोग माग्नुपर्छ,” उनले भने ।
विद्युत् अभावले बालबालिकाको पढाइ, घरायसी काम तथा सञ्चार सम्पर्कमा समेत असर परेको अर्का स्थानीय छेछन सदाको भनाइ छ। दशैंका बेला गाउँका अन्य घरमा बत्ती बलिरहँदा आफ्नो बस्ती अन्धकारमा रहनुपर्दा स्थानीयवासी थप दुःखी भएका छन् ।
मुसहर बस्तीका परिवारको प्रतिघर करिब पाँच हजारदेखि सात हजार रुपैयाँसम्म विद्युत् महसुल बक्यौता रहेको स्थानीयले बताएका छन् । दैनिक ज्याला मजदुरी तथा सामान्य आयस्रोतमा निर्भर परिवारका लागि एकैपटक हजारौँ रुपैयाँ जुटाएर महसुल तिर्नु चुनौतीपूर्ण बनेको रामचन्द्र सदाले बताए ।
विद्युत् उपभोग गरेबापत महसुल तिर्नुपर्ने दायित्व रहे पनि कमजोर आर्थिक अवस्थाका कारण बक्यौता रकम एकमुष्ट बुझाउन नसकिएको स्थानीयको भनाइ छ । यही कारण चाडपर्वको समयमा समेत उनीहरू विद्युत् सेवाबाट वञ्चित हुनुपरेको छ ।
यता, नेपाल विद्युत् प्राधिकरण वितरण केन्द्र बोदेबरसाइनका प्रमुख अनिल चौधरीले लामो समयदेखि विद्युत् महसुल नबुझाएका कारण बस्तीको लाइन काटिएको बताए ।
उनका अनुसार विद्युत् सेवा पुनः जडानका लागि हालसम्म बस्तीका कोही पनि सम्पर्कमा आएका छैनन् । प्राधिकरणले विद्युत् उपभोग गरेबापतको महसुल बुझाउनुपर्नेमा जोड दिएको छ ।
विद्युत् महसुल उठाउनु प्राधिकरणको दायित्व भए पनि आर्थिक रूपमा कमजोर परिवारले एकैपटक बक्यौता रकम बुझाउन नसक्दा कसरी सेवा निरन्तरता दिने भन्ने प्रश्न उठेको छ । बक्यौता तिर्नुपर्ने दायित्व र न्यून आय भएका परिवारको आर्थिक कठिनाइबीच समाधान खोज्नुपर्ने आवश्यकता देखिएको छ ।
दशैंका बेला गाउँबस्ती उज्यालो भइरहँदा मुसहर बस्ती अन्धकारमा रहनुले गरिबी र आर्थिक अभावले दैनिक जीवनमा पार्ने असरलाई उजागर गरेको छ । विद्युत् महसुल तिर्न नसक्ने परिवारका लागि सहुलियत वा किस्ताबन्दीमा भुक्तानीको व्यवस्था गर्न सकिन्छ कि सकिँदैन भन्ने प्रश्नसमेत यस घटनाले उठाएको छ ।
